GIKLARO ni Gobernador Gwendolyn 'Gwen' Garcia nga magpabilin ang pag-ban sa mga pork ug meat products dinhi sa Sugbo gikan sa ubang rehiyon.
Kini human sa giingong wa magtumong nga impormasyon ngadto sa lokal diin nagtuo sila ug gi lift na ang ban tungod sa mando sa Department of Interior and Local Government (DILG) sa pagpasulod na sa mga produktong de lata basta muagi lang sa heating process ang mga produkto.
Gahapon moabot sa P12, 341.85 ang laing mga produktong baboy na sab nga nasakmit sa ASF Task force sa syudad sa Toledo.
Matod ni Dr. Mary Rose Vincoy, Provincial Veterinary Office (PVO) head, nga mas nimubo na hinuon ang gidaghanon sa mga produkto nga nasakmit sa mga lokal tungod sa subsob nila nga paglibot ug pag-nspeksyon sa 53 ka mga lungsod sa Sugbo.
Makalibog?
Naglibog na ng publiko kon gilibkas na ba o wala pa ang giisyu nga ban sa mga produktong baboy gikan sa Luzon, matod ni Dr.Vincoy.
Matod pa, gipagawas nga advisory sa (DILG), pagtugot na sa pag pasulod sa mga produktong baboy sa Kabisayaan ug Mindanao basta muagi lang ang mga produkto sa saktong heating process bag-o kini i-transport, pagsiguro nga wala’y kagaw mi-taput sa mga produkto.
“Nag-wonder pa sila recently tungod sa pronouncement sa DILG nipagawas na, kay they were informed sa ilang mga suppliers nga gi lift na kuno ang ban mga misinformationnya murag gipasa-pasa, na confused ang uban ang uban ani before wala na man unta ni unya mao na tungod sa misinformation gibalikan namo ang mga lungsod ug syudad to inform them nga wala gi lift ang ban,” matod ni Vincoy.
Aron mahatagan ug katin-awan, subling gipahibaw ni Garcia nga magpadayon ang ban sa mga produktong baboy nga gikan sa Luzon padulong dinhi sa Sugbo.
“The ban stays., I have talked about this to Secretary Michael Dino and supports my decision and my position, in fact he has also written to DILG Sec. Ano regarding protecting Cebu from the entry of ASF virus,” matod ni Garcia.
Apan gipasabot ni Vincoy nga dili gihapon luwas ang ubang produkto bisan paman ug ipaagi sa heating process tungod kay kon nataptan na kini sa kagaw, dili garantiya nga namatay kini sa kainit ug possible usab kini nga mas mudaghan kon mabugnawan.
Sa padayon nga paglibot sa African Swine Fever (ASF) Task force sa 53 ka mga lungsod sa probinsya, niadtong Oktubre 23, 2019 may P12, 341.85 na sab nga balor sa mga produktong baboy gikan sa Luzon ang nasakmit sa task force sa syudad sa Toledo.
Nikunhod na hinuon matod pa ang gidaghanon sa ilang mga nasakmit tungod sa subsob nga pagpakatap sa mga impormasyon kabahin sa kadaot nga dala sa ASF kon man gani kini makasulod sa Kabisayaan.
Kalit nga inspeksiyon
Atol sa mga surprise inspections sa grupo, gawas sa dili kompleto nga mga dokumento kuwang usab ug sanitary permits ang mga tindahan ug kan-anan nga usa sa pinaka importante nga i-secure sa matag tindahan aron pagsiguro nga limpyo ang mga gitindang produkto, paglikay na usab sa pagtakud-takod sa kagaw.
Padayon usab nga gituki karon sa task force ang kaso nga atubangon sa mga makalapas sa ordinansa, sa kasamtangan P5,000 ang multa sa mga tindahan nga nakalapas sa Executive Order No. 16 nga giisyu sa Gobernador batok sa ASF.
“Definitely the Provincial ASF Task force will continue its monitoring and surveillance not only in 51 towns under niya but also for highly urbanized cities, ka yang mahitabo ana ang mamalitay sa Cebu City nga establishments traga lungsod man so naa gihapon mi concern ana kay pag uli sa lungsod gikan sa mga malls naa gihapoy epekto its not about jurisdiction para sa akoa kung this is prevention and control cut across nata sa jurisdiction,” matod ni Vincoy.
Sa pagkutlo sa maong balita, gipahibaw na sa kauluhan nga may nagpositibo na nga mga produktong baboy atol sa gihimong laboratory test sama sa mga produktong longganisa, tocino ug hotdog.
Wala pa hinuon gibutyag ang mga brand name sa maong mga produkto. (ANV)