ANG mayor sa lungsod sa Clarin, Misamis Occidental kinsa gireklamo nga nanukmag sa lalaking masahista ug nagpaugay sa babaye nga masahista nasikop sa Mactan airport Huwebes sa hapon, Oktubre 24.
Sa iyang pagkasikop sa mga sakop sa Abellana police station sa Cebu City Police Office (CCPO), gihimakak ni Mayor David Navarro ang pasangil nga iyang gikulata ang masahista.
Si Navarro nianhi sa Cebu aron pagtambong sa usa ka workshop kabahin sa development plans sa lungsod sa Clarin nga gipahigayon sa usa ka hotel dapit sa Fuente Osmeña sa Cebu City.
Ang hotel adunay massage and spa parlor sa third floor.
Si Navarro naka-check in sa maong hotel. Siya nagpamasahe sulod sa iyang kwarto niadtong Miyerkules sa gabii, Oktubre 23.
Matod ni Police Major Eduard Sanchez, hepe sa Abellana police station, naka-check out na ang mayor sa dihang giadto sa mga pulis ang hotel.
Tungod niini, gimandoan siya ni P/Brig. Gen. Valeriano de Leon nga pangitaon si Navarro tungod sa iyang salaod nga nahimo sa Cebu City.
Padung na mosakay si Navarro sa eroplano nga mobiyahe paingon sa kaulohan apan gibabagan siya tungod sa reklamo kaniya.
Matod ni Sanchez, wala dayon masikop si Navarro sa Abellana police niadtong Miyerkules sa gabii, Oktubre 23, tungod sa hangyo sa mga masahista nga sa buntag na sila makighusay sa mayor.
Gipaabot si Navarro sa police station pagkabuntag apan wala siya nagpakita ug nipaingon na hinuon kini sa airport aron mosibat sa reklamo nga gipasangil batok kaniya, matod ni Sanchez.
Asoy sa masahista
Si John Dueñas, taga lungsod sa Alcoy, Cebu ug kasamtangang nagpuyo sa Barangay Mambaling, Cebu City, nireklamo sa Abellana police station tungod sa pagsukmag kaniya sa mayor.
Iyang gipakita ang bun-og sa iyang tiyan nga resulta sa pagsumbag sa mayor.
Matod ni Dueñas, naabot sa ilang spa ang mayor nga hubog kauban ang tulo niya ka bodyguard ug nangita og babaye nga masahista.
Apan ang tanang babaye nga masahista adunay customer niadtong tungora ug walay makaatiman kaniya.
Dinhi nag-wild ang mayor ug ang panghitabo narekord sa CCTV camera sulod sa spa.
Nibuhi matod pa og estorya ang mayor nga iyang hatagan og kwarta ang mga lalake aron sumbagon.
Gisunod usab sa pagbinastos ang babaye nga manager sa spa. Wala makaantos si Dueñas iyang gibadlong ang mayor ug siya na hinuon ang gisukmag ni Navarro.
“Human nakog badlong mibalik kog sulod pero gisundan ko ni Mayor ug iyang mga kauban. Gikulata nako,” matod ni Dueñas.
Mihunong lang sa iyang pagpanumbag ang mayor sa dihang ang spa manager misaad nga magpadala kini og babaying masahista sa iyang kwarto sa hotel.
Gipadala sa spa management ang usa ka babaye nga masahista ngadto sa lawak ni Navarro apan inay nga hiloton ang iyang lawas ang kinatawo na man hinuon ang gipahilot niini.
‘Di tinuod’
Naabtan sa mga tigbalita si Navarro human sa iyang pagkasikop. Matod niya, na-bayolente siya niadtong tungora tungod kay giinsulto siya ni Dueñas.
“Ila kong gibastos, nahagit ko. Ako siyang nabaklid, mao to. Kung gisukmag, gikulata, kita man mo sa itsura (ni Dueñas), wala ra man maunsa,” matod ni Navarro.
Wala na nihatag og detalye si Navarro ug iya nalang abogado ang manubag sa mga pangutana kabahin sa panghitabo, matod niya.
Matod ni Sanchez, tulo ka kaso ang i-file sa Abellana police batok kang Navarro-physical injury, acts of lasciviousness ug unjust vexation.
Narco list
Si Navarro nalakip sa narco list ni President Rodrigo Duterte. Sigun sa kasaligang tinubdan sa Superbalita Cebu, si Navarro ang suod nga higala sa hinigugma ni Herbert Colangco, giingong drug lord, nga si kanhi Ozamis City mayor Nova Parojinog.
Siya usab matod pa ang hagbongan sa illegal nga drugas gikan kang Colangco nga gipaagi ni Parajinog.
Wala pay gipasaka nga kaso ang Department of Interior and Local Government batok nila ni Navarro ug Parojinog. (Dugang taho ni Rebecca B. Roberts)