TALISAY City Treasurer’s Office nakakolekta og dul-an na og P268 milyones sa ikatulo pa lang nga quarter ning tuiga tungod sa mas subsob sa ilang gihimo nga koleksyon.
Pinaagi sa gipatuman karon nga examination sa books of accounts sa mga business establishment sa siyudad.
Gani 60 porsyento sa ilang koleksyon ning tuiga, nagikan sa buhisan sa mga negusyo.
Ug ila na gilantawan nga sa katapusang quarter, kapin sa P100 milyones ang makolekta ilabi na nga gihingusgan sugod niadtong Hulyo ning tuiga ang examination sa books of accounts nga una nahimo sa dakbayan.
Dugang ni Emma Macuto, ang City Treasurer, nga naandan na usab nga sa katapusang’ quarter diha sagad modagsa ang mga mobayad sa buhis sa business, real property ug uban pa.
Target hinuon nila karong tuiga ang kapin sa P400 milyones, taas og P100 milyones sa 2018 nga target.
Ang koleksyon ning tuiga, ang idugang alang sa gamiton sa gi-proposed 2020 nga budget ni Talisay City Mayor Gerald Anthony Gullas.
Gitug-an ni Macuto, nga 60 porsyento sa nakolekta na nga buhis ang gikan sa business tax, diin sa kapin P267 milyones, P164 milyones ang gikan sa business tax.
Mapasalamaton kaayo si Macuto nga sa mga negusyante sa dakbayan sa Talisay, menus ang delinquent tax payers, kon aduna man, usa lang ka notisya, dali ra usab kini nga mosanon, hinungdan nga dili ra moabot sa closure order o pag-revoke sa permit sa pamatigayon.
Ning tuiga nisaka usab ang mga nanguha’g permit alang business establishments.
Gikan sa kapin 2 mil sa miaging’ tuig, matud ni Macuto, aduna nay kapin sa 3 mil ka mga business establishment.
Ug gilantawan nga sa sunod tuig motaas pa kini, ilabi na unya sa ilang pagpatuman sa business tax mapping sugod sa Enero o Pebrero 2020.
Giangkon ni Macuto nga menus lang sila sa koleksyon sa real property, ilabi na nga ang uban ang nag-advance na sa miagi nga tuig.
Human usab nga kasagaran mo-avail sa 20 percent discount kon advance ang pagbayad.
Nakatampo usab sa koleksyon ang franchise tax, sedula ug uban pa.
Bisan pa man nga wala ra magk-problema sa mga mamumuhis ang Talisay CTO, apan nagpahinumdom gihapon si Macuto sa ubang wala pa kabayad, nga dili na paabuton pa nga magdasok na karong Disyembre, ug himuon na kini sa sayo pa lang. (FMD)