MGA duwa karon
4:30 pm- Blackwater batok Alaska
6:45 pm- Ginebra batok Rain or Shine
Sumpayan og suway sa Brgy. Ginebra Gin Kings ang ilang duha ka sunodsunod nga kadaugan sa ilang pagpakigsangka sa Rain or Shine Elasto Painters sa main game karong gabii sa Philippine Basketball Association (PBA) Governor’s Cup sa Araneta Coliseum.
Ang Gin Kings gikan sa duha ka sunodsunod nga kadaugan batok sa Grandslam-seeking San Miguel Beermen, 129-124, ug Magnolia Ang Pambansang Manok Hotshots, 105-83, nga nakapasaka sa ilang rekord ngadto sa 3-2.
“I’m hoping it gives us the confidence,” matod ni Gin Kings import Justin Brownlee. Kasamtangang nagpatong ang Gin Kings sa ikalimang luna ug aduna pa’y dakong poruhan nga makailog og puwesto sa top four nga adunay pakapin nga twice-to-beat nga bintaha sa quarter-finals.
Ang Elasto Painters usa sa mga nagbitay sa may ilawom nga bahin dala ang 2-5 nga rekord apan taas ang ilang moral ning sangkaa gumikan kay hikan sila sa dakong kadaugan batok sa Blackwater Elite, 99=82, niadtong Miyerkules sa pagpangulo sa ilang bag-ong import Kwame Alexander.
Sa laing duwa, magkombati ang pulos nagsalimoang nga Blackwater ug Alaska Aces.
Gumikan kay sikit ang standings sa ilawom nga bahin, grabe ka mahinungdanon kining kombati sa Aces ug Elite.
“Isang panalo lang kasi, malaki iaangat mo sa standings,” asoy ni Blackwater coach Aris Dimaunahan.
Ang Elite adunay 2-5 nga rekord samtang ang Aces naggunit og 1-6 nga baraha. (ESL)