DUNAY panultihon nga nag-ingon ang buhok maoy korona sa ka-anyag (crowning glory) maong kasagaran nato labi na kitang mga babaye mangita gyud og panahon ug paagi para ang buhok motaas, mosinaw og ma-angayan.
Gani ang uban mogasto og dako para lang magpa salon, rebond o palit og mahalong hair care products ug mga vitamins.
Apan kahibalo ka ba nga daghan sab ang maka-ingon sa pagka-daot sa buhok?
Pananglitan kining paggamit og mga init nga rollers, curling irons o blow driers para pagkulot o straight sa buhok. Ang init ini maoy maka-ingon pagka-uga sa buhok , pagkasunog, ug split-ends maong mas maayong mogamit og mga heraminta nga di init sama sa ordinaryong mga plastic o foam nga curlers.
Ang paghugas sa buhok gamit ang shampoo di sab angay inadlawon kay makadaot sab kini labi na kung masubrahan pagkiskis ang bagol-bagol. Mao sab kini rason sa kaspa. Ang paghugas sa buhok ka duha ngadto katulo ra kada semana.
Ang sayop nga pagpili sa shampoo makapasamot sab pagkalarot sa buhok labi na kung duna kini sulod nga sulfates nga makapatangtang sa kolor ug uga sa bagol-bagol. Seguroa pagpili kanang nay marka nga sulfate-free.
Ang kusog nga pagtrapo sa basa nga buhok gamit ang tualya makapalarot ug pagpanglagas sab labi na sa may punuan. Mas rekomendado ang pagputos sa buhok gamit ang tualya nga maoy mosuyop sa subrang tubig.
Ang conditioner makatabang pagpasinaw ug humok sa buhok apan kung inadlawon makapanipis sab kini.
Kung kanunay salapiron, pinangkuon, pugngan o lastikuhan labi na kung basa pa makapa-gabok sab sa buhok maong dali ra kini mangalarot. Kung basa pa gali, ayaw una pamugong.
Dili na tinuod ang gi-ingon nga angay sudlayon ang buhok ka 100 ka besis kada adlaw kay mao hinuon kini hinungdan sa pagka luya ug bugto sa hairstrands. Hinuon gamitan kini og sudlay nga dagko og kang-a.
Katapusan, angay putlan o i-trim kada 2 o 3 ka bulan aron mangakuha ang split ends, ma porma ang buhok nga maoy kurona sa atong ka-anyag.