TUNGOD sa subra kadako sa kantidad?
Susihon sa kapulisan sa Mandaue ang gidaklarar nga kantidad sa mga alahas ug kuwarta sa upat ka jewelry stores ug usa ka money changer nga nabiktima sa pagpanulis niadtong Oktubre 19 sulod sa J Centre Mall sa dalan A.S Fortuna, siyudad sa Mandaue.
Matod ni Police Brigadier General Valeriano De Leon, hepe sa Police Regional Office (PRO) 7, nga sa pagkakaron dawaton lang una nila ang gideklarar sa maong mga tindahan nga matod pa nga niabot og kapin P130 milyunes.
Dili una siya mobanaban sa kadako sa nakuha sa mga tulisan diin nagpadayon pa sila sa ilang imbestigasyon kung kini gituyo ba aron makuha ang dako nga insurance niini.
Nag estorya na usab sila ni Secretary Michael Dino diin ang ilang gihisgutan ang maong gidak-on sa kantidad sa nakuha sa mga tulisan.
“Simply we do not want to speculate, kase yun yung idiniclare nila," matod ni De Leon.
Gitinguha niya karon mao ang pagpangita sa mga pabilin nga gawasnong mga suspek.
Nagtuo si De Leon nga naa pa dinhi sa Sugbo ang mga tulisan nangitag paagi nga maka gawas agi sa mga pantalan apan nag lisud kini tungod kay adunay mga covert personnel nga nagbantay.
Gani nakaabot usab sa iyang buhatan ang kasayuran nga mianhi sa Sugbo ang lider sa grupo sa Kuratong Baleleng nga nagbase sa Ozamis City.
Ilabi na karon nga nagkaduol na ang Pasko dako ang posibilidad nga mangigo kini dinhi.
Tungod niini, nakigtagbo siya sa mall security officers aron ma palig-on pa nila ang ilang pagbantay tungod sa panahon sa kapaskohan.
Hangpon usab nila ang pagpasulod sa mall sa mga pulis kung itugot kini apan depende sa sitwasyon sanglit adunay mga tawo nga dili ganahan nga adunay pulis sa mga dagkong tindahan.
Human sa insidente sa tulis sa J Centre Mall nagpa-deploy na siya og personnel gawas sa mall.
Wala sila mokompyansa sa pagkakaron tungod sa pagtuo nga mobawos ang grupo sa mga tulisan ilabi na nga dunay ilang kauban nga namatay.
“But what they project is hindi papahuli ng buhay yan as much as possible. Pinag iingat natin ang ating kapulisan at ang ating intelligence community,” matod ni De Leon.
Wala usab siyay pagsupak sa Commission on Human Rights (CHR) sa paghimo og imbestigasyon sa kamatayon sa upat ka mga suspek.
Matod niya nga trabaho sa maong ahensya ang pagsusi kung wala bay nalapas nga tawhanong katungod ang kapulisan sa dihang giingong nisuway og pag-ilog sa armas sa kapulisan atol sa ilang pagkasikop. (AYB)