WALA na makaabot nga buhi sa buhatan sa piskaliya sa siyudad sa Sugbo si Mayor David Navarro sa Clarin, Misamis Occidental.
Sakay sa police car ug gipatung-an og pulis sa back seat, si Navarro gi-ambush sa upat ka mga armadong lalake nga sakay sa usa ka puti nga van.
Nahitabo ang ambush pasado alas 2 sa hapon Biyernes, Oktubre 25, 2019 sa M. Velez St., Barangay Guadalupe, Cebu City.
Si Navarro gidakop niadtong Huwebes, Oktubre 24, tungod sa reklamo nga nangulata kini og masahista ug nibuhat og malaw-ay nga lihok sa babaye nga masahista Miyerkules sa gabii, Oktubre 23, sulod sa iyang hotel room.
Si Navarro dinhi sa Sugbo aron motambong og workshop kabahin sa development plans sa iyahang lungsod. Ang workshop gipahigayon sa usa ka hotel duol sa Fuente Osmeña sa Cebu City, ug ang massage parlor anaa sa third floor sa hotel.
Si Mayor David Navarro ug si Dante Navarro, lider sa Alferez Robbery Group nga gipaluyohan sa giila nga drug lord nga si Herbert Colangco.
Kini ang gihatag nga impormasyon sa National Capitol Region Police Office (NCRPO).
Niadtong Oktubre 19, 2019, gitulis ang pipila ka jewelry shop ug pawnshop sulod sa J Centre Mall sa Mandaue City.
Lima sa mga tulisan ang nadakpan sa Polangbato pier sa Bogo City, Cebu samtang gapaabot nga makalarga ang barko nga ilang gisakyan paingon sa Masbate. Napatay ang upat kay giingong nisukol sa mga pulis.
Nasubay nga pipila sa mga tulisan miyembro sa Alferez Robbery Group nga nagbase sa Ozamiz City, Misamis Occidental.
Sakay sa Mahindra patrol car sa Abellana police station 2 si Navarro. Gipatung-an siya sa hepe sa Clarin police station, giila nga si Capt. Matugas, ug usa niya ka igsuong babaye.
Ang Mahindra patrol car adunay laing unom nga pasahero ug ang drayber niini.
Galingkod sa kinaluyohan mao ang laing igsuong babaye ni Navarro, duha ka pulis nga giila nga silang Cpl. Eugenio Catalan ug MSg. Balasoto, ug usa ka amigo sa pamilyang Navarro.
Tapad sa drayber nga si MSg. Velasco, ang laing pulis, Pat Javier. Ang mga pulis mga sakop as Abellana police station.
Nagsunod sa Mahindra patrol car ang escort vehicle, usa ka puti nga Starex van. Wa pa matino kung kinsa ang sakay.
Ang hepe sa Abellana police station, si P/Major Eduard Sanchez, sakay sa laing police car ug nag-una kini.
Pag-abot sa likoon paingon sa buhatan sa Cebu City Prosecutors Office, ilang nakasugat ang puti nga van.
Gibabagan ang Mahindra.
Ang nag-unang police car nga sakay si Sanchez nakaliko na.
Nanaog gikan sa puti nga van ang upat ka lalake nga mga nakaitom ug gabitbit og tag-as nga mga armas.
Sa mga nakakita sa panghitabo ug nakaila og armas, ilang gihulagway nga M14 armalite rifle ang bitbit sa mga lalaki.
Usa kanila ang miduol sa Mahindra ug giabli ang pultahan sa luyo, ug gibunlot ang mayor gikan sa iyang gilingkoran.
Sa nakakanaog na si Navarro, gidul-it siya pagpusil sa lawas sa makadaghang higayon.
Pagkatumba niya, giusban pa siya pagpusil sa nagkadaiyang bahin sa lawas ug ulo.
Nasamdan ang duha ka police escorts ni Navarro-- si P/Cpl. Catalan sa Abellana police station ug ang hepe sa Clarin police station.
Usa ka saksi, si Borgie, niadtong higayona nagpaayo sa iyang sakyanan nakurat sa buto-buto nga nadungog sa pagtuo nga transformer lang sa kuryente.
Sa iyang paglingi, iyang nakit-an ang upat ka mga armadong tawo ang namusil.
"Paglingi nako kato siya (mayor Navarro) gikoptan diri sa may liog nya gibunlot pagawas sa Mahindra. Mao tong natumba siya. Then gitionan sa armas nya niatras girakrakan na dayon," matod ni Borgie.
Si P/Maj. Sanchez, ang hepe sa Abellana police, kinsa nangunay pagdala ni Navarro sa buhatan sa piskaliya, nagkanayon nga wala siya kabantay nga gi-ambush na ang mayor.
Matod ni Sanchez, nag-una ang iyang sakyanan pagsulod sa buhatan sa piskaliya. Gitawagan nalang sila sa iyang sakop nga gi-ambush na sila.
Gikan sa Abellana police station, gipasul-ob nila ang mayor og bulletproof vest ug gituyo nga patung-an kini kay kung adunay mosuway pagpatay niini adunay makasukol.
"Nag-una mi sa sakyanan nya nagsunod ang gisakyan sa mayor katong patrol car ug katong van pud nga gisakyan sa iyang mga kauban. Wala mi kabantay nga naay nagsunod. Padayon pa mi sa imbestigasyon kung pila gyud ang samdan," matod ni Sanchez.
Tungod sa kadaghang buto sa armas, nagpasad sa karsada ang mga basiyo sa bala. Wala pa matino sa kapulisan kung unsay kalibre niini.
Usa sa mga nakasaksi nitug-an nga ang van nga gisakyan sa mga armadong tawo nagdala og plate number nga gisuwat ra sa karton.
Matod sa saksi nga kung mi-on lang dayon ang iyang cell phone, ma-video-han unta niya ang panghitabo.
"Pakapaka nag maayo ang armas. Miduol ko ngari oy. Dili man diay ni tiaw-tiaw. Tan-aw ko, pinusilay man. Pagkahuman, nipadagan mi paingon sa simbahan sa Guadalupe," matod sa saksi.
Ang manghod nga babaye sa mayor nga si Princess Madarang nagsunod sa convoy wala magdahom sa ambush.
Nagtuo siya nga makauli na sila sa lungsod sa Clarin karong adlawa, Sabado, kay mopyansa man unta sila pag Biyernes sa kasong slight physical injury, acts of lasciviousness ug usurpation of authority nga gipasaka sa Abellana police station.
Sa pagkakaron wala pa silay gipangdudahan nga tawo nga nagpatay sa iyang maguwang.
Wala na usab siya mangayo og hustisya sa kamatayon sa iyang maguwang kay nakapangutana na siya karon nga wala na kini sa nasud sa Pilipinas.
"Naa bay justice? Kinahanglan pa ba ko manawag og justice kung wala gihapoy justice, di ba? I know we live in a very remote place ug kinsa ra man ang maghatag og justice namo. Today naa ko sa Cebu City, parte sa Philippines, but I feel wala ko sa Pilipinas. No family, no sympathy, walay kaluoy, matod ni Madarang.
Gihulagway niya ang iyang maguwang nga buotan nga igsuon ug manggihatagon.
Matod ni P/Lt. Melbert Esguerra, deputy director for administration sa Cebu City Police Office (CCPO), blangko pa sila karon kinsa kadtong mga armado ang nibanhig sa mayor.
Adunay umolon nga task force tungod kay usa man ka incumbent official ang biktima sa lungsod sa Clarin.
Sa iyang bahin, si Cebu City Mayor Edgardo Labella nimando sa CCPO to conduct an investigation of the shooting incident involving the Clarin, Misamis Occidental Mayor David Navarro. (AYB, BBT)