HINAYHINAY na’ng migimaw ang gikahadlukang puwersa sa panag-uban sa duha ka All-Stars nga sila si LeBron James ug Anthony Davis, ang panagpares nga labing giatangan sa 2019-20 season sa National Basketball Association (NBA).
Si James, kinsa four-time MVP, nagpakatap og 32 puntos ug 10 assists samtang nidugang og 21 ug pito ka rebound si Davis aron agakon ang hosts Los Angeles Lakers sa 95-86 nga kadaugan batok sa Utah Jazz kagahapon.
Maayo sab nga nakaduwa si Troy Daniels alang sa Lakers ug niamot kini’g 15 puntos alang sa kadaugan.
Ang Jazz gipangulohan ni Donovan Mitchell pinaagi sa iyang 24 puntos samtang nihatag og 13 puntos si Mike Conley.
Gikan sa 43-43 nga panagtabla sa sayong bahin sa 3rd quarter, ang Lakers nagpaulbo og makabungog nga 31-12 run aron iposte ang 74-55 nga labaw.
Human niini, ang labing duol nga nahimo sa Jazz mao na lang ang siyam ka mga puntos nga biya.
Gawas sa ilang nagdilaab nga opensa, ang Lakers nagpakita sab og maayong depensa nga maoy hinungdan nga nakamugna ang Jazz og 23 ka turnovers.
“We are the real deal defensively,” matod ni Davis. “We try to lay our hats on defense. We want to be a defensive-oriented team, and guys came in and were pesky today.”
Ang Lakers, nga nasubhan og kapildihan batok sa Los Angeles Clippers, grabe ka agresibo sa opensa ug depensa – hilabi na si James – sa nag-unang tulo ka quarters nga wala naalkontra sa Jazz.
“He was just locked in and had a really good night in both halves, but particularly in the second half,” matod ni Lakers coach Frank Vogel kabahin kang James.
Ang Jazz, nga nasubhan og kadaugan batok sa Oklahoma City Thunder, naglisod pagpugong sa kabangis nga gipakita sa Lakers hapit sa kinatibuk-ang duwa.
“We were talking about our offense all preseason and how it was good, and our defense was bad,” matod ni Utah coach Quin Snyder.
“Now our offense hasn’t been good... There’s a part of it that you’re getting connected and things like that, but there’s also part of it where we just need to be stronger with the ball. We need to be more decisive. We need to be more precise.”
Sa Boston, gipangpukan sa hosts Celtics ang defending champions Toronto Raptors, 112-106.
Ang Celtics gipangulohan ni Jaylen Brown ug Jayson Tatum pinaagi ilang 25 puntos matag usa samtang niamot og 22 puntos si Kemba Walker.
Sa lain pang mga duwa, gipatapsingan sa Denver Nuggets ang Phoenix Suns, 108-107, gipangmakmak sa Minnesota Timberwolves ang Charlotte Hornets, 121-99, gipangpukan sa Dallas Mavericks ang New Orleans Pelicans, 123-116, gipayukbo sa Brooklyn Nets ang New York Knicks, 113-109, gipanglampornas sa Washington Wizards ang Oklahoma City Thunder, 97-85, gipangsungag sa Chicago Bulls ang Memphis Grizzlies, 110-102, samtang gipaluhod sa Portland Trailblazers ang Sacramento Kings, 122-112. (ESL)