SI ANTONIO Uy o Toñing, usa sa unom ka mga lalaking midawat og pasidungog isip humanitarian advocate niadtong 1996.
Si Uy maoy pinakabata nga awardee nga midawat kauban sila Msgr. Maurice Michaud, Tomas Monteverde Sr., abogado Guillermo Torres Sr., Francisco Villa-Abrille, ug Engineer Antonio Floirendo.
Bisan kaniadto pa, daghan na og kontribusyon si Uy nga gikaayo sa dakbayan diin siya midawat na og daghang pag-ila kalabot niini.
Siya usa ka negusiyante apan mas nailhan siya sa iyang dakong pagmahal sa serbisyo nga halos isakripisyo na sab ang kaugalingong kinabuhi.
Luyo niini, aktibo sab siya isip Boy Scout leader diin niadtong elementarya pa siya didto niya nahanas ang iyang pagka-Boy Scout sa Mindanao Colleges dihang elementarya pa siya.
Ang maong tunghaan giila na karong University of Mindanao.
“I never thought that I would be part of public service. Perhaps it is because of my personal desire to be of service to our community and our people,” ni Uy.
Si Uy usa ka Eagle Scout, leader trainer, ug miyembro sa International nga Training Team, ug miyembro usab siya sa Asia-Pacific Regional Task Force.
Nahimo sab siyang Regional Commissioner for Leader Training, National Commissioner for Emergency Services, ug Chief National Commissioner of the Boy Scouts of the Philippines (BSP).
Gimugna sad ni Uy ang Emergency Service Corps nga organisayon nga nag tabang panahon sa pagbaha, sunog, ug uban pang kalamidad nga miabot sa siyudad.
Tungod sa iyang pagka-miyembro sa Boy Scouts of the Philippines, naka-angkon siya og mga medalya sama sa Bronze Medal of Honor, Gold Medal of Merit, ug Gold U.S.A. Medal.
Nahatagan sab siya sa pinakataas nga award sa BSP nga mao ang Gold Tamaraw Award ug Lifetime Achievement Award isip “true-blooded scout.”
Nakadawat sab siya og Tanglaw ng Kabataa nga pinaka-prestihiyoso nga award sa usa ka Filipino Scouter nga mihimo og talagsaong serbisyo alang sa mga kabataan sa nasud pinaagi sa Scouting.
Kini nga pasidungog ginahatag sa presidente sa nasud.
Gawas sa BSP, aktibo pud siya sa Philippine National Red Cross sa dihang nanguna siya sa pagmugna sa Davao City Chapter Building niadtong tuig 2007.
Midawat si Uy og Gold Humanitarian Award kauban si Senator Richard Gordon ug uban pang international nga mga opisyales sa International Committee of the Red Cross niadtong tuig 2007.
Aktibo pud sya nga Rotarian diin nahimo siyang presidente sa Rotary Club sa siyudad sa Davao niadtong 1995-1996 diin uban sa iyang mga proyekto nagfocus sa pag-abag sa mga gikinahanglan sa komunidad sa kabukiran lakip na sa Marilog ug Paquibato nga mga distrito.
Nanguna siya sa konstruksiyon sa water reservoir alang sa limpyo nga tubig mainom ug mipakatag sa mga educational na materiales didtong lugara.
Tuig 2017, midawat siya sa highest recognition of Rotary International, nga gitawag og Service Above Self Award.
Matod ni Uy ang pagtabang iyang gihimo tungod iyaha kini nga obligasyon isip residente sa Davao. (Nila Ma. Corena Joy M. Biñan ug Claire Yvonne Aznar, AdDU interns)