Vallena: Lahi rang Baguio

BAGUIO City - Usa mga malisod nga rota sa mga lumba sa road bike mao ang sa kabukiran sa Benguet. Di lalim ang pagtungas kay daghan sab ang hait nga portion, sama sa Transcentral Highway (TCH). Apan sa akong tan-aw, mas daghan og hait nga portion ang pagtungas niining dakbayan gikan sa La Union. Apan ang nakalisod sa TCH mao ang kainit. Sa Baguio, mas bugnaw ang hangin kay sa Cebu.

Duha ra usab ka mountainbikers ang akong nakit-an nga mitindak. Gamay ra sab ang akong nakit-ang nagbiseklita ug pipila ra sab ang nagmotorsiklo. Wa diay habalhabal diri kay gidili. Gamay ra usab ang Baguio kon itandi sa Cebu City. Gawas sa Cebu City, naa pa ang upat ka nagakanait nga mga siyudad nga tipik sa Metro Cebu. Busa wa kaayo kinahanglana ang mga habalhabal kay dali ra kang makasakay basta di lang rush hour.

Di lisod ang transportasyon ning siyudara kay naay daghang taxi nga di manglubag sa mga pasahero ug mangtuman sa balaud.

Trapiko

Nahimuot ko kay ingon pa sa mga drayber nga huot ilang trapiko. Apan, haskang layoa ra nila kon itandi sa problema sa trapiko sa Metro Cebu. Ang ilang mga sakyanan, atol sa rush hours, mag-aginod ra man. Unyag kaabot sa unahan mohapsay rag balik ang dagan. Lisod sab hinuon ang pagsakay atol sa mao nga mga oras busa mag-inabtikay. Apan layo ra lagi ang ilang suliran diri itandi sa Cebu.

Tungason

Kon yano lang nga biker, di kaayo ideal ang Baguio kay gawas nga gagmay ang mga karsada, daghan ang portions nga grabe katungason.

Kon average lang nga manikaray, lisod diri. Di pareho sa mga dan sa Metro Cebu nga patag ra. Kon dunay mga tungason, mugbo ra.

Ang nakanindot sa Baguio mao ang disiplina sa mga tawo. Tagsa ra kang makadungog og binusinahay sa dan. Di bintahaan ang Cebu sa paugatay sa karsada. Magsininggitay pa aron ilhon kinsay isog.

Maanindot unta kon magrespetahay sa usag usa sa karsada. Ang nakapait kay magpaugatay man hinuon. Masuko pa bisan sayop. Sama anang no right turn on red signal. Kon naa ka sa atubangan, papahawaon ka kay lagi moagi siya paliko sa tuo bisan puwa ang signal. Usa nako ka higala nakakitag lalis kay nasuko ang nagsunod kay wa niya palutsa.

Unsa kahay padulngan aning nasora nga bisan ang pagsunod sa traffic law di mahimo?

Gusto man kaha kitag kausaban? Ngaong di man nato sugdan sa atoang kaugalingon inay nga magsige kitag basol sa atoang gobyerno?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph