MAGUINDANAO PROVINCE -- Lima ka improvised explosive devices (IEDs) ang narekober sa Bangsamoro Islamic Armed Forces-Moro Islamic Liberation Front (BIAF-MILF) alas 3 sa hapon niadtong Biyernes, Oktubre 25.
Kini mismo ang gikompirma ni MILF-BIAF National Guard Front Commander George Kasim.
Dali gilayon nga gidepyus ang mga bomba aron nga di na makahatag og katalagman sa mga awtoridad ug katawhan.
Mga nahisgutang IEDs kabahin sa nibusikad nga mga IEDs nga gipakatag sa Bangsamoro Islamic Freedom Fighters (BIFF) sa lugar nga ilang giatrasan human gilutos sa militar ug MILF.
Kahinumdoman nga nailog sa hiniusang puwersa sa 57th Infantry Battalion, Philippine Army, ug MILF ang kampo sa BIFF nga giingong gilubloban sa mga sakop sa grupo ni Shiekh Esmail Abdulmalik, alyas Kumander Abu Toraife.
Samtang nabuthan sab ang walo ka mga sakop sa MILF og bomba samtang naglutos sa mga BIFF didto sa Sitio Mapagkaya, Barangay Dasawao, Shariff Saydona Mustapha niadtong niaging adlaw.
Mga samaron naila nga sila Ahmad Guialudin, Norhamin Saliguidan, Islamin Ibrahim, Asladin Ismael, Harold Adam, Dagul Balanu, Fahad Matabalao, ug Abdulhamid Matabalao.
Sa pagsuwat ning balita, padayon pang gilutos sa militar ug MILF ang BIFF sa Liguasan Delta ug SPMS Box sa nahisgutang probinsiya. (Edgar E. Fuerzas)