BISAN pa man og abusado o sakop man sa Kuratong kini si anhing Mayor David Navarro sa Clarin, Misamis Occidental, gipatay siya sa miaging adlaw nga binantayan og mga pulis dinhi sa Sugbo.
Moabot kuno og napulo ka tawo ang ni-ambus sa convoy nga nagdala ni Mayor Navarro. Usa kanila ang nibunlot sa mayor sakay sa usa ka awto ug gibanhigan. Way pulis nga naggwardya kaniya ang nakapabuto sa ilang armas.
Bisan unsaon pa sa pagkisikisi sa kapulisan nga makalingkawas kay sad-an ug nalambigit sa gidiling drugas kini si Navarro, di malimod nga napatay siya samtang gigwardyahan sa kapulisan.
Nakapabuto ba ang mga gwardya nga pulis?
Kon ingon ana ang abilidad sa atong kapulisan sa pagbantay sa seguridad sa usa ka mayor, unsa na lang kaha ang ilang mabuhat kon ordinaryong mga lungsoranon ang target?
JMALL
Mao nga mahimuot ko maghunahuna niining reklamo nga di ipadala sulod sa J MALL ang mga armas sa kapulisan nga mosulod sa maong establisamento.
Ang maong isyu nitumaw human adtong spectacular nga tulis sa mga ahensya sa alahas sulod aa maong mall.
Di man deterrent diay sa mga determinadong kriminal ang mga armadong mga pulis. Sakto ang punto nga kon duna pay armadong pulis dihang nahitabo ang tulis, dako ang posibilidad nga magkapinusilay ug maangin ang mga ordinaryong namalitay sulod sa mall.
Kini ang gilikayan sa mga tag-iya sa mall.
Tuod man, dalaygon ang kalamposan sa kapulisan sa pagkasikop dayon sa pipila ka mga suspek.
Bahala na og hangtod karon, wala pa makit-i ang pipila ka milyon nga kinawat nga kwarta ug mga alahas.
Bahala na og upat sa mga suspek, nga naki-ang gipangposan apan namatay daw dihang nisuway kini sila sa pag-ilog sa mga pusil sa mga pulis ug moeskapo.
Hinuon, maghulat na lang kita sa resulta sa imbestigasyon sa Commission on Human Rights (CHR).
Ninja cops
Kining ingon niini nga mga hitabo di makatabang sa paninguha karon sa mga nasudnong opisyal sa Philippine National Police (PNP) nga ayuson ang kahimtang sa kapulisan human sa makauulaw nga scandal kabahin sa ninja cops.
Lalim bay ang hepe mismo sa tibuok kapulisan nga si Hen. Oscar Albayalde nalambigit diay sa giingong ninja cops kaniadtong 2013 didto sa Pampanga?
Bisan pa man sa iyang pagluwat sa katungdanan pipila ka semana sa di pa unta siya moretiro isip pulis, nagbilin siya og usa ka organisasyon nga ubos kaayo ang morale. Gawas sa pagsalig sa katawhan, nasuko pa gyud si Presidente Rodrigo Roa Duterte kanila.
Alang kanako, dakong hagit alang sa kapulisan ang pagpabalik sa pagsalig sa publiko. Ug kining atong gihisgutan nga panghitabo dinhi sa Sugbo, di makatabang kanila. (@anol_cebu sa Twitter)