SUPERBALITA CEBU

Mipapatay sa mayor naila na?

DUNAY gidudahang mga suspek sa pagbanhig-patay ni Clarin, Misamis Occidental Mayor David Navarro sa dalan M. Velez, Barangay Guadalupe sa siyudad sa Sugbo, pasado alas 2:00 sa hapon, niadtong Biyernes, Oktubre 25.

Sa press conference sa hepe sa Cebu City Police Office Police (CCPO) Colonel Gemma Vinluan kagahapon sa buntag, Oktubre 26, iyang gibutyag nga nagduda ang pamilya nga ang nanghulga kang Mayor Navarro sa Ozamis City mao ang nagpatay niini.

Wala na kini mohatag pa og dugang detalye sa gipangtug-an sa kabanay apan giingong usa kini ka organisadong grupo nga nagbase sa Misamis Occidental.

Ang mayor nakadawat og hulga sa iyang kinabuhi busa gihigpitan niini ang iyang seguridad sa opisina sa lungsod sa Clarin.

“May mga grupo duon allegedly na nagbigay na ng mga threat. They received threats si mayor mismo ang nag nag received ng threats sa certain groups duon, pero kung sino yun ayaw ko munang sabihin,” dason ni Vinluan.

Adunay ngalan kung unsa nga grupo ang gitumbok sa pamilya nga inila nga notado na sa Misamis Occidental ug mga silingan niining probinsya nga gitawag nIyang organized crime groups.

Task Group

Giumol na sa CCPO ang Special Investigation Task Group nga maoy mo tutok sa imbestigasyon sa kamatayon sa mayor.

Kini nag langkob sa City Intelligence Branch, Criminal Investigation and Detection Group (CIDG) 7, Guadalupe police station, PNP Crime Laboratory 7, Regional Intelligence Operating Unit ug Regional Legal Division 7 diin si Colonel Vinluan ang ground commander ug ang supervisor ang bag-ong Deputy Regional Director for Operation Police Colonel Geovanie Maines.

Daghang anggulo ang ilang gisubay sa pagkakaro kini mao ang pulitika, negosyo, personal ug ang ilegal nga drugas.

Matod ni Vinluan nga nabutang sa ikawalo sa listahan ni President Rodrigo Duterte nga high value target sa kalambigitan sa ilegal nga drugas ug mahimong aduna pay lain nga mahimo nilang subayon.

Mga saksi

Gipakuhaan na niya og mga pinanumpaang pamahayag ang mga nakasaksi sa krimen lakip na ang sakay sa patrol car nga giluwanan sa mayor ug sa puti nga starex van.

Upat usab ang nasamdan sa maong insidente nga mao silang Police Corporal Eutemio Catalan sakop sa Abellana police station nga maoy driver sa Mahindra patrol car, Police Chief Master Sergeant Roberto Sanoy nga nadestino sa Clarin police station.

Samtang ang sakay sa starex van nga naangol mao silang John Baylon ang municipal administrator sa Clarin ug usa nga wala pa mailhi.

Dugang ni Vinluan nga adunay usa kanila ang naa sa kritikal nga kondisyon sa usa ka pribadong tambalanan sa siyudad sa Sugbo.

Sakay sa Mahindra patrol car mao silang Mayor Navarro, Police Corporal Catalan, Patrolman Javier, Police Master Sergeant Balasoto, Novie Grace Navarro igsuon sa mayor, Police Captain Bobby Matugas hepe sa Clarin police station, Alvin Roa bayaw sa mayor ug si Princess Carmel Navarro Madarang ang manghod sa mayor.

Ang sakay sa Hyundai starex van nga adunay plate number YHV 825 mao silang alyas Johnny, duha ka consultant ni Mayor Navarro nga silang Beneto Johnson ug Christopher Ramayrat, John Baylon ang Municipal Administrator, Atty. Marcelian Tapayan, konsehal Remor Lomoljo, Police Chief Master Sergeant Roberto Sanoy sa Clarin police station ug usa ka alyas “Tambok” nga reporter sa usa ka radio station sa San Carlos City, Negros Oriental.

Daghang igo sa ulo, abaga ug duha ka bukton ang naangkong samad pinusilan ang nakita sa mga sakop sa Scene of the Crime Operation sa dihang ilang gihiling ang patayng lawas ni Navarro.

Nakakuha ang Scene of the Crime Operatives (SOCOs) og 25 ka basiyo sa bala sa caliber 45 ug 38 ka basiyo sa M16 armalite rifle nga nagpasabot lang nga adunay dakong kasuko ang mga suspek ngadto sa mayor.

Lider sa tulis?

Apan, dunay mga kasaligang tinubdan sa Kampo Crame nga nahinabi sa Superbalita Cebu nagkanayon na nga ang mayor nianhi dinhi sa Sugbo aron pagtabang sa mga nadakpan nga tulisan nga nanulis sa upat ka jewelry stores sa J Centre Mall sa siyudad sa Mandaue.

Gitumbok siya nga maoy leader sa usa ka dakong robbery group nga Alferez nga una nang nangigo sa mga bangko sa kaulohan ug sa kabisay-an.

“Kana siya sa among na monitor (nga) financier na siya sa grupo nilang Tayros, bisan na mayor nana siya sa Clarin padayon gihapon siya nga nag finance aning grupoha..." matod sa tinubdan.

Giuli sa Clarin

Kagabii, Sabado, Oktubre 26, ang lawas ni Mayor Navarro giuli na sa Clarin sakay sa usa ka barko padulong sa dakbayan sa Ozamis.

Sa pagkakaron, ang pagbanhig-patay ni Navarro nagbiling tanghaga ug padayong gisusi sa awtoridad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph