SA IKATULONG sunod-sunod nga higayon sa 2019, former World Boxing Association Oceania Featherweight champion Cebuano Jessie Cris “VIP” Rosales moaway sa US, ning higayona, batok ni American Xavier Martinez.
Ang Rosales versus Martinez showdown mao'y main event alang sa 10-round non-title Super Featherweight fight nga ipahigayon karong Biyernes, Nobiyembre 1, 2019 (Sabado RP Time) nga gidalit sa Mayweather Promotions, isalida sa Showtime Cable Television.
Si Rosales, 27, 5’8," tuohon (22-3-1, 10KO) gikan sa duha ka sunod-sunod nga kapildihan. Unang kapildihan batok ni Shakur Stevenson via knockout niadtong Enero 18 samtang ang ikaduha batok ni Tyler McCreary via split decision niadtong Hulyo 19.
Samtang undefeated si Martinez, 22, 5’8," tuohon (14-0, 10KO) apan gikan sa unom ka sunod-sunod nga knockout nga kadaugan.
Si Rosales nga nahinabi sa Superbalita Cebu nga maayo ra ang dagan sa iyang ensayo uban nila ni trainers Bobet Yñes nga taga Iligan City ug Spanish Jorge Washington.
“Okay ra kaayo ang training, nagkuha o nag-adjust nalang ko sa timbang nga 130 pounds limit. Sparring partner nako diri si Anthony Reyes ug mga kauban,” birada ni Rosales ning tigbalita.
Gitug-an ni Rosales nga kauban niya karon sa training camp sa Indio, California ang mga boxers nga silang Cebuano Jason Pagara, Eugene Lagos nga taga Lebak, Sultan Kudarat, ug Leonardo Doronio nga taga Valencia, Negros Oriental.
“Ikatulo na nako ni nga away sa US karong tuiga busa maninguha ko matira ang matibay ani nga fight,” panapos ni Rosales. (Daniel Quindao Guden, US Correspondent)