NAKURAT si Senator Christopher "Bong" Go atol sa pagbisita niini sa siyudad sa Cagayan de Oro nga nabalitaang napatay sa pagpamanhig ang mayor sa Clarin, Misamis Occidental didto sa dakbayan sa Sugbo.
Gisikop niadtong Oktubre 25 sa Cebu City si Mayor David Navarro human nangulata og masahista apan sa dihang dalhon na kini sa piskalya wala na kini makaabot human gi-ambush, Oktubre 26 sa M. Velez St., Cebu City.
Gibutyag ni Go nga paabuton nalang niini ang imbestigasiyon sa kapulisan ug gani giingong nisulay na kini sa paglimpyo sa iyang ngalan kang Secretary Eduardo Año sa Department of Interior and Local Government (DILG).
"Murag nag testing naman ni og clear sa iyang kaugalingon sauna when he was among the narcolist, he tried talking to Secretary Año nga i-clear ang iyang kaugalingon, " matud ni Go.
Samtang gikompirma sa Police Regional Office 10 (PRO-10) nga anaa sa listahan ni Presidente Rodrigo Duterte ang Mayor.
Sa pakighinabi kang Police Lieutenant Colonel Mardy Hortillosa, tigpamaba sa PRO-10 gikabutyag nga si Presidente Rodrigo Duterte ang nagbutyag nga lakip sa iyang listahan o “narcolist” si Navarro ug gani ila nga gipailalom sa pag-validate ang maong taho.
"Yes si President Duterte mismo nagsulti ana," matud ni Hortillosa.
Giingong sutaon pa usab ang taho nga lider kini sa usa ka robbery group.