DAVAO DEL SUR -- Nagsugod na og dagsa ang mga pasahero sa nagkadaiyang pampublikong terminal sa lalawigan sugod kagahapong adlawa.
Masinati karong semanaha ang taas nga bakasyon sanglit special non-working holiday na ang adlaw’ng Biyernes, Nobyembre 1, nga mao ang “All Saints Day”.
Sa Bansalan, Davao del Sur, nipauli na si Hazel Bueno, 37-anyos, human nag-leave na sa nahibiling adlaw sa trabaho.
Gikan sa dakbayan sa sugbo si Hazel apan buot niining makauban sab og taas nga adlaw ang iyang pamilya una sila mobisita sa mga sam-ang aron pagduaw sa mga kabanay nga mitaliwan na.
Sa Digos City Overland Terminal, nagpunsisok na sab ang mga pasahero aron mopauli sa nagkadaiyang kalungsuran ug silingang probinsya sa Davao Occidental.
Si Rico Gonzales, 25-anyos, construction worker, gikan pa sa Cagayan de Oro, apan sayong niuli sanglit layo alang niya ang lugar sa iyang trabaho mao nga buot niining taas nga adlaw makauban ang pamilya didto sa Padada, Davao del Sur.
Pipila lang kini sa mga pasaherong midagsa sa mga terminal sa lalawigan.
Gilauman nga mas modaghan pa ang mga pasaherong mopauli aron makauban ang mga kabanay ug mga minahal sa kinabuhi nga nipanaw na.
Samtang, nagpasidaan ang kapulisan sa lalawigan sa tanang drayber ilabi pa sa mga de-pasaherong van nga di magkaskasero ug likayan ang overloading aron luwas sa disgrasya.
Aduna sab mga checkpoint nga ipakatag ang kapulisan aron masigurong luwas ang byahe sa mga pasahero diin ang uban ipang-deploy sa mga terminal alang sa hugot nga seguridad.