MAGSAYSAY, Davao del Sur - Human gitay-og sa kusog nga linog, nakasinati sab og pag-uwan og “ice” ang Barangay Barayong, Sabado sa hapon.
Nag-trending sa social media ang nagkadaiyang post sa mga netizens kalabot sa nahitabong pag-uwan og ice nga daw susama sa holen ang gidak-on.
Dungan sa pagbundak sa kusog nga uwan, nasinati sab ang pag-uwan sa ice o hail.
Nagpangatagak sa atop sa mga balay sa mga molupyo sa lugar ang gahi nga hailstone.
“Nag-uwan og ice diri sa Barayong,” sa post ni Rhea May Saban.
Gikumpirma sab ni Anthony Allada, tigpamaba sa lokal nga kagamhanan ug nagkanayon sa iyang post sa social media nga “ice ice baby.”
Sigon sa Philippine Atmospheric Geophysical and Astronomical Administration (Pagasa) mahitabo ang “hail” sa mga nasud nga tropical sama sa Pilipinas.
Ang hail mao ang ice nga matagak gikan sa usa ka severe thunderstorms.
Gipasabot sa Pagasa nga mahitabo ang hail kung nakasinati og tumang kainit sa usa ka lugar hinungdan nga motaas ang water vapor nga mahimong molampas sa gitawag nga freezing level (0°C) kung diin ang water vapor pwede nga mogahi ug mahimong ice.
Dugang sa pagpasabot, nag-ingon nga kung daghan na ang ice sa ibabaw sa thunderstorm clouds mahimo kining matagak sa yuta.
Ang maong tibag sa mga ice mahagbong ug adunay kapaspason nga 100 kilometro matag oras.
Pipila sa mga residente nangalisang, pipila sab nangalipay ug nag-iyahay og post sa social media nga Facebook.