TAGUM CITY -- Gibalhog na sa prisohan ug naghulat sa sunod nga mandu sa korte labot sa ilang kaso ang duha ka giingong coordinator sa money investment schemes human masikop sa awtoridad niadtong Biyernes.
Nasikop sa Tagum City Police Station ang coordinator ug staff sa Titan 29 nga sila Ryan Johnskyle Maunes, 27-anyos, public speaker sa TITAN 29 MARKETING ug residente sa Barangay Abejod, Cateel, Davao Oriental; ug si Anabelle Lalina Pepito, 47-anyos, minyo, coordinator sa maong investment scheme ug residente sa Purok Cattleya, Barangay Visayan Village, Tagum City.
Nasikop ang mga dinakpan subay sa warrant of arrest nga gipagula sa korte kung diin nag-atubang ang mga nahisgutan sa kaso nga large scale estafa human nga gireklamo sa daghanang mga investors.
Dugang niini, walay girekomenda nga piyansa ang korte sa kaso nila Maunes ug Pepito.
Nasayran nga ang maong warrant of arrest ang gisilbi sulod mismo sa Branch 30, Hall of Justice, Provincial Capitol sa Mankilam, Tagum City human nga nangadto ang mga nahisgutan alang sa pag-follow-up sa ilang hold departure order.
Sa pagkakaron, anaa na sa kustodiya sa Tagum City District Jail, sa Barangay Canocotan, Tagum City, Davao del Norte ang nasampit nga mga dinakpan.