SUSPENSUHON una sa Cebu City Transportation Office (CCTO) ang clamping operation sa mo-park og mga sakyanan sa kadalanan karong Huwebes, Oktubre 31; Biyernes, Nobiyembre 1; ug Sabado, Nobiyembre 2 lang sa pagtimaan sa All Saints ug All Souls Day o kalagkalag.
Si Ret. Col. Andres Bayarcal, hepe sa CCTO, niingon nga bisan paman nga gisuspenso nila ang pag-clamp, ang traffic enforcers padayong mobuyag sa mga magpasagad og parking labina duol sa mga sam-ang sa dakbayan.
Dunay gitagana nga tukmang parking area ang matag dapit duol sa sam-ang aron pagmintar sa kahusay ug kalinaw.
Samtang, andam na usab ang kapulisan sa tibuok rehiyon sa ilang pagbantay sa seguridad atol sa kalagkalag, lakip sa mga terminal ug pantalan nga dagsaan og daghang mga tawo nga mamauli.
Lakip ang Department of Health (DOH) andam na usab sa pag-atiman sa mga emerhensiya atol sa kalagkalag.
Giawhag ang publiko sa pagtamod sa mga pasidaan sa awtoridad ug pagsunod sa mga lagda sa sam-ang.
Giawhag sa DOH ang publiko sa pagdala og payong o kalo aron pagpanagang sa kainit sa adlaw ug kalit nga pagbunok sa uwan. (BBT)