USA ka kanhi pulis o retiradong sakop sa Philippine Constabulary (PC) ang gidakop sa Talisay Police, Biyernes sa buntag, Oktubre 25.
Kini human nanion og armas sa usa sa mga sakop sa City of Talisay-Traffic Operation Development Authority (CT-TODA) sa Barangay San Roque, dakbayan sa Talisay.
Matod sa Talisay Police nga ang biktima nga si Eduardito Fernandez, 58 anyos, sakop sa CT-TODA, ang nagpakitabang sa kapulisan sa Talisay, sa nahitabong pagpanion og armas ngadto kaniya.
Ang suspek naila nga si Rosalio Ybas, 79 anyos, minyo, molupyo sa sitio Kimba, Barangay San Roque.
Sa inisyal nga pakisusi sa Talisay Police, nasuta nga nihimo sa iyang trabaho isip usa ka enforcer ang biktima diha sa dan.
Nakita ug gisita niini ang usa ka batan-on nga nagmaneho og motorsiklo nga wala magsul-ob og helmet.
Sa dihang padung na unta nga moisyu og citation ticket ang biktima ngadto sa batan-ong drayber, kalit nga naabot si Ybas ug ang apohan sa gisita ni Fernandez.
Nihangyo ang apohan sa batan-on ug ang suspek nga pasayluon na ang batan-on.
Nibalibad ang biktima sa hangyo sa duha ug nipasabot nga igo ra usab kini nihimo sa iyang trabaho ug way si bisan kinsa nga nakalapas ang pasayluon, ilabi na sa kalapasan sa trapiko aron pagdisiplina.
Hinungdan nga ang suspek nga si Ybas ang giingon nga nilabnot sa motorsiklo dayon sumbag sa biktima.
Sa dihang miaksyon og depensa ang biktima sa iyang kaugalingon, giingon nibunot sa iyang .38 nga revolver ang suspek dayon tion sa biktima. (FMD)