GIBANABANA nga 2,400 ka mga punoan sa marijuana ang naibot sa kapulisan sa bukirang barangay sa Tag-bao, siyudad sa Sugbo sa miaging semana.
Gipangulohan ni PLtCol.Randy Korret, hepe sa City Force Mobile Company uban ang Philippine Drug Enforcement Agency (PDEA) 7 nga niresulta sa pag-ibot sa mga punoan sa marijuana.
Matod ni Korret, mokabat sa dul-an usa ka milyon ka pesos ang kantidad sa marijuana ang naibot sa ilang gihimong Oplan Jungle.
“Mga three to six feet ang iyang gitas-on sa maong mga punoan ang among na diskobrehan sa among gihimo nga lima ka adlaw nga operation.”
Gilibot sa mga operatiba ang mga bukirang barangay sa Babag, Bonbon, Buot-Taop, Sinsin, Sudlon l, Sudlon ll ug Tabunan.
Dugang ni Korret nga nasuta nila nga usa ka Michael Racoma Cubong alyas “Michael” aka “Robert” ang wala na maabti sa mga operatiba dihang napalgan ang mga punoan sa marijuana.
Samtang nagkuha lang og pipila ka mga punoan sa nadiskobrehang marijuana aron mapasakaan og kaso ngadto sa korte ang mga tawo nga nagtanom niini ug ang uban gipangsunog sa dapit. (BBT)