NALIPAY ang managsuong Ouano sa desisyon sa Sandiganbayan sa pag-abswelto sa kaso nga giatubang sa 11 ka akusado lakip na ang ilang amahan, kanhi mayor sa siyudad sa Mandaue ug bokal, nga si anhing Thadeo “Teddy” Ouano.
Nalambigit si Ouano sa gialegar nga anomaliya sa pagsupply ug pag-install sa lampposts alang sa Association of Southeast Asian Nations (ASEAN) niadtong 2006.
“When we were informed of the decision of the Sandiganbayan yesterday, we were overwhelmed with happiness. Even though our father is not here with us to hear his name cleared, we are very grateful of the verdict,” sigon ni Provincial Board Member Thadeo Jovito “Jonkie” Ouano, kamanghuran nga anak ni Teddy.
Nanghinaot sab si Jonkie nga karon nga nalimpyo na ang ngalan sa iyang amahan mahinumdoman kini sa Mandauehanon isip maayo nga tawo.
Si Congresswoman Emmarie “Lolypop” Ouano, representante sa 6th District nga usa usab ka anak ni Teddy, niingon nga mapasalamaton siya sa hukom sa Sandiganbayan tungod kay nahatagan na og hustisya ang iyang nitaliwan nga amahan ug ang mga inosente nga indibidwal nga nalambigit sa maong kaso.
“Finally, justice has spoken. Papa Ted is vindicated of all the insinuations and doubts about that controversy,” sigon sa kongresista.
Dugang niya nga nindot unta og nakadungog ang iyang amahan sa maayong balita apan nakontento ra sab sila nga nahupay na ang maong kontrobersyal sa pagkakaron. (KFD)