NASANGAD ang barko sa Jomalia Shipping Corporation human nagkaproblema ang auxiliary engine niini ug nawagtangan kini og kontrol.
Hinuon, luwas ang tanang 311 ka pasahero niini lakip na ang 19 ka tripolante ug 23 ka rolling cargos nga sakay niini.
Ang pagsangad nahitabo kini alas 7:45 sa buntag sa Dominggo, Oktubre 27, diin diha kini nasangad mga 200 metros duol sa pantalan sa Consuelo, lungsod sa San Francisco, isla sa Camotes.
Gikan sa pantalan sa dakbayan sa Danao ang barko nga MV Mika Mari 3.
Hinuon namaniobra ra sa kapitan sa barko nga si Larry Sacedon ang maong barko ug hingpit kini nga nakadunggo sa pantalan sa Consuelo.
“Said vessel self extracted and safely arrived at Port of Consuelo, Camotes. All passengers and rolling cargos safely disembarked the vessel,” matod sa tigpamaba sa Philippine Coast Guard District Central Visayas Lieutenant Junior Grade Michael John Encina.
Gitambagan na usab ang kapitan sa barko nga mosumitir kini og marine protest ngadto sa Maritime Industry Authority (Marina) 7.
“Wala pong sira, nag-tripped off lang po yung generator niya kaya po nabawasan ng control and eventually na ran aground,” nagkanayon si Encina.
Nasayran nga base na usab sa datus sa Philippine Atmospheric, Geophysical and Astronomical Services Administration (Pagasa), low-tide o hunas dihang nibiyahe ang barko.
Niadtong Agusto 31 ning tuiga, nag-atubang og problema usab ang usa ka barko sa Jomalia.
Ang MV Mika Mari 8 natikyaob usab sa maong pantalan sa Camotes.
Aduna’y kahadlok nga nasinati ang pipila ka mga pasahero human sila makasaksi sa pagtikyaob sa MV Mika Mari 8, sa Jomalia Shipping Corp.
Ang barko nitakilid sa pantalan sa Consuelo sa isla sa Camotes samtang nagpakanaog og rolling cargo kun mga sakyanan gikan sa pantalan sa Dakbayan sa Danao, Sabado sa hapon.
Luwas hinuon ang 149 ka mga pasahero ug 18 ka tripolante sa barko, apan gidala sa tambalanan ang upat ka mga pasahero nga nanginahanglan og medikal nga atensiyon.
Base sa pakisusi sa Coast Guard District Central Visayas pinaagi sa tigpamaba niini nga si Encina, linaw ang dagat niadtong higayona.
Apan samtang nagpakanaog na kini og rolling cargo o sakyanan, didto na kini na out of balance ug natikyaob. (B)