NISIBAW karon ang pangutana kon luwas pa ba ang Sugbo human sa pagbanhig ug pagpatay sa wa mailhing mga tawo ni Clarin, Misamis Occidental Mayor David Navarro pasado alas dos sa hapon niadtong Biyernes, Oktubre 25, 2019, didto sa M. Velez St., Cebu City.
Ang mga environmentalist sab niingon nga di na luwas ang mga kahoy sa Sugbo nga anaa sa kadalanan. Daghan kanila gipaputol na sa Department of Public Works and Highways (DPWH) ubos sa pagtugot sa Department of Environment and Natural Resources (DENR).
Hastang mga sakop sa board of director sa Metropolitan Cebu Water District (MCWD) di na luwas. Gipaputol ni Cebu City Mayor Edgardo Labella ang ilang mga termino kay nireklamo ang local government units nga gisilbihan sa MCWD sa kakuwang sa supply sa tubig.
***
Wa mailhi si Mayor Navarro dinhi sa Sugbo kon wa pa siya magpamasahe. Nangitag masahista nga babaye, apan kay nahurot man, gihatagan og masahistang lalake. Nasuko ug gikulata ang masahistang lalake. Nakuha kini sa CCTV camera. Gipadad-an siya og masahistang babaye, gusto pa gyud nga masahian ang pribadong bahin sa iyang lawas.
Nisumbong sa kapulisan ang duha ka masahista. Kay wa siya motunga, gipangita siya ug nasakpan didto sa Mactan airport nga naghuwat sa iyang flight paingon sa Manila. Sa dihang dad-on na unta sa piskaliya, gibanhigan siya. Wa kalihok ang iyang police escorts, di sama sa salida ni Bruce Willis.
Wa pa mailhi kon si kinsa ang nanagbanhig kaniya. Pero nalakip siya sa narcolist sa pangulo ug giingong pangulo siya sa usa ka pundok sa mga tulisan. Di luwas ang Sugbo niadtong naa sa narcolist ug niadtong mga gikatahapang kriminal.
***
Mahitungod sa pagputol sa mga kahoy, si City of Naga Acting Mayor Kristine Vanessa Chiong niingon nga usa ka gatos ka mga seedling sa kahoy ang itanom hulip sa matag usa sa pito ka mga kahoy nga apektado sa road widening sa maong siyudad. Sa ato pa 700 tanan.