NANGINIT karon ang kampo ni International Boxing Federation (IBF) world boxing Super Flyweight champion Davaoeño King “Pretty Boy” Jerwin Juntilla Ancajas (31-1-2, 21 knockouts) human nasayran nga mihagit kaniya si Mexican WBC champion Juan Francisco “El Gallo” Estrada (40-3, 27 KO) alang sa Unification title fight.
Si Ancajas ug iyang team gibati sa duha ka butang human miabot sa ilang dunggan ang pag challenge kanila. Una nalipay sila sa positive future opponent ikaduha nabalaka sila sanglit posibleng makabalda kini sa ilang naghinapos nga training.
“May narinig kami at nakarating sa amin na naghamon si Estrada kay Jerwin (Ancajas). Kaya plano ni sir Sean Gibbons (MP Promotions president) na kung manalo laban kay Mexican Jonathan “Titan” Rodriguez posibleng si Estrada na ang iharap ng Top Rank Promotions kay Jerwin” saysay ni coach Joven Jimenez sa Superbalita Cebu via chat online.
Si Ancajas naghinapos na sa iyang training alang sa ika-walo nga pagdepensa sa iyang bakus batok ni Mexican IBF #15 contender Rodriguez karong November 2 Sabado, oras sa Estados Unidos sa Dignity Health Sports Park sa Carson, California.
“Sa ngayon naka focus muna kami kay Rodriguez bago si Estrada. Pero ang masabi lang namin, patay kung patay ang laban na ito ni Jerwin kay Rodriguez” birada ni Jimenez ang trainer ug manager ni Ancajas.
Si Jimenez kanhi Philippine Boxing National team member sa wala pa nahimong trainer sa Philippine Navy Boxing team. Ang iyang amahan si Angeles lumad nga taga Badian, Cebu apan nakapangasawa ni Virgincita Hallasgo-Jimenez nga taga Iligan City.
Sa pikas bahin, gihugopan si Ancajas sa mga Filipino-Americans sa Veterans Park sa Carson, California sa miaging adlaw atol sa gihimong Meet and Greet nga gidalit sa Top Rank alang kaniya.
Misamot kadaghan ang mihimamat kang Ancajas sanglit mitakdo ang nahisgutang adlaw sa Larry Iliong’s Day celebration nga gisaulog sa mga Pinoy sa nahisgutang dapit apil na ang Santos nga Misa. (Daniel Quindao Guden, US Correspondent)