TALISAY City Mayor Gerald Anthony Gullas moluwat og Executive Order (EO) sa mga gidili sulod sa sam-ang ning paghandum sa adlaw sa mga kalag ug santos karong Nobiyembre 1 ug 2, 2019.
Personal nga misusi si Gullas sa pampubliko ug pribadong sam-ang sa dakbayan Lunes sa buntag, Oktubre 28.
Sa pagsiguro nga mahimong solemni ang kalihukan, matud sa mayor nga mo-isyu siya og EO pagdili sa mga dagkong sound system diha sa mga sam-ang.
Lakip nga idili ang pag-inum sulod sa sementeryo.
“Maghimu og executive oder nga kining mga dagku nga speaker, inum wala gyud na siya sulod sa sam-ang. Because it should be a solemn and family event and maglisud na ta og buyag kon nangahubog na ang atong mga gikapakig-estoryaan og tarung," pasabot sa mayor.
Dugang usab ni Police Major Gerard Ace Pelare, ang hepe sa Talisay City Police Office, nga did-an nila sa pagpasud sa mga sam-ang sa Talisay City ang mga nakainum na og ilimnong makahubog.
Idili usab ang pagpasulod og mga hait nga hinagiban, armas, ilegal nga drugas ug mga baraha.
Usa na sa gisiguro ang insakto nga entrance ug exit aron dili usab mabiktima sa mga salisi, ug uban pang klase sa kawat ang mga moduaw diha sa mga sam-ang.
Sugod karong Miyerkules, Oktubre 30, ipang-deploy na ang mga pulis, diin ang pito ka mga sam-ang sa syudad butangan og quick response team. (FMD)