ABI gyud nako og naplantsa na ang mga gum-os bunga niadtong pagtukod sa Sinulog Board nga maoy akong nabalak-an kabahin sa preparasyon alang sa Sinulog 2020.
Hangtod karon man gud, moguwa gihapon ang balita nga sa meeting sa Sinulog Board, wa diay labot si Bise Mayor Mike Rama nga maoy chairman sa Sinulog Foundation Inc. board of trustees.
Atong nabasa nga nagplanong magpundok ang mga tigsuporta sa bise mayor kagahapon nga maoy iyang adlawng natawhan (Happy Birthday diha, Vice!)
Sa miaging mga Sinulog, ang Sinulog Foundation maoy mohimo sa mga heneral nga plano ug ang ubang mga ahensiya igo na lang modetalye ug mopakanaog niini.
Karon, makalibog kay kinsa man diay ang mohimo sa mga heneral nga plano? Ang Sinulog Foundation? O ang Sinulog Board?
Angay lang nga maplantsa kini sa labing daling panahon kay mag-Nobiyembre na ug wala pa diay magkasinabot ang mga haring-gangis.
Nakakita man gyud ko unsa ang pagpadagan sa Sinulog gikan sa sulod sa miaging duha ka tuig. Makaingon ko nga kulang gyud kaayo ang duha ka bulan alang sa mga preparasyon kaniadtong walay sami ang pagpadagan sa Sinulog Foundation.
Dayon gamay ra ang mga bag-ong kalihokan dayon gipahunong pa gyud ang mga street party duol sa ruta sa prosesyon ug Sinulog parade.
Mas daghan ra ba ang mga kausaban nga giplano alang karong Sinulog 2020 dayon dapat maghiusa pa sila ana.
Pananglitan, nakauyon diay kita nga wagtangon na ang short film o kadtong video contest? Dayon ilisan og vlogging contest?
Personally, wa man koy problema anang vlogging. Apan nganong wagtangon man ang short film/video contest?
Kon dugangan ang mga kalihokan sa Sinulog 2020, makaapas pa ba kaha sa dugang gastohan ang sponsorship marketing nga padung na man sa Nobiyembre ug katunga sa Disyembre, namakasyon na ang mga modesisyon sa mga potential sponsors.
Super fast break ug double time ang mga marketing people sa Sinulog 2020.
Kining akong gihisgutan, tipik lang sa kadako sa labad sa ulo kon hangtod karon wala pa magkasinabot lagi ang mga haring gangis.
Hinuon, sa mga naandang mga kalihokan sa Sinulog sama sa grand parade ug kining Sinulog sa Kabataan, daw mura na man og well-oiled machine. Di na kaayo mabalaka ang mga bag-ong organizer karon.
Bisan pa man sa akong kabalaka, manghinaot gyud ko nga ila rang matanos ang mga gum-os ug atong masaulog ang labing bongga nga Sinulog sukad. (@anol_cebu sa Twitter)