SUPERBALITA CEBU

Espinoza: Pagbantay mo!

Nagpakabana

SAKIT. Sakit paminawon apan tinuod ang komedya nga nawagtang ang puti nga van sulod sa 60 segundos human gibanhigan ug gipusil-patay si Clarin Mayor David Navarro niadtong Biyernes sa hapon sa Velez St., nga nagsakay sa police car ug dunay police escorts, nga atong masabot nga wala diay problema sa trapiko.

Gani, nalakip sa komedya nga si Presidential Assistant Michael Lloyd Dino mimando nga di na ipadayon ang proyekto sa BRT, LRT ug mass transport system aron usab di maputol ang mga kahoy kilid sa dalan tungod sa maong hitabo nga kalit nga nawala ang puti nga van nga gisakyan sa mga armado nga tawo nga maoy mipusil-patay ni Mayor Navarro.

Luoy sad si Cebu City Mayor Edgar Labella kay maoy gibasol sa pagpatay ni Clarin Mayor Navarro. Matud pa sa mga gipangsuwat sa mga netizen dili na luwas ang dakbayan sa Sugbo ubos sa pamunoan ni Mayor Labella. Nahikatawa ko sa mga komentaryo apan di kalikayan kay siya man ang mayor hapit tanan problema sa dakbayan adto ibundak niya.

Daghan ang di makatuo sa pagbanhig ug pusil-patay ni Clarin Mayor Navarro, nga gidala sa pulis sa Cebu City Prosecutor’s Office aron pasakaan og sumbong nga slight physical injuries sa iyang pagsuntok sa masahista nga wala silay kasayuran sa unahan tungod kay gipasul-ob si Navarro og bullet proof vest nga gamay ra man ang iyang kaso. Hinuon, gipasanginlan si Navarro nga lider siya sa pundok sa tulisan ug nalakip siya sa narco list ni Presidente Duterte.

Sakit alang sa duha ka igsuon nga babaye ni Mayor Navarro nga nakakita giunsa siya og patay kay nagkuyog man sila sa police ug sa mga baho nga isyu nga nanggawas human siya gipatay. Si Novie Grace, igsuon ni Clarin mayor Navarro, igo na lang mitiyabaw, “Naa bay hustisya?”

Manghinaut ta nga mogawas ang tinuod nga hinungdan sa pagbanhig ug pusil-patay ni Clarin Mayor Navarro pinaagi sa imbestigasyon nga gipahigayon sa pulis.

•••

BANTAY. Dunay mga pagduda na karon sa katarung ug kaligdong ning usa ka banko tungod kay nadiskobrehan sa ilang mga depositor nga gikawat sa manager ang ilang dako nga deposito. Di lang sa nako hinganlan ang manager ug ang banko samtang nag-umol pa ang mga biktima sa kaso nga ilang ipasaka sa korte batok sa banko ug manager.

Matod pa sa usa sa mga biktima nga akong nahinabi niadtong Biyernes nga silang mga biktima dako og pagsalig sa manager tungod kay ilang suod nga higala. Mao nga dako ang kwarta nga ilang gibutang sa time ug savings deposit sa branch ning maong banko, nga naa nahimutang duol sa Kapitolyo.

Ang nakaparat, matod sa biktima, kay ang kadagkoan sa banko di na manginlabot sa maong hitabo ug ilang giduot ang branch manager, nga mikagiw na. Di moubos sa P20 milyunes ang gikawat sa manager ning maong banko. Matod pa sa biktima, gikopya ang ilang pirma sa pag-withdraw sa ilang pundo. Mga depositor, pagbantay mo ani nga banko! Kon mangutana mo, texi ko sa 09173148347.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph