KON aduna ka’y iro o kaha suod mo sa imong lola, para imoha kini nga salida.
Ang Popstar Royalty nipamatuod na usab nga dili lang siya total performer apan motigi na usab kini isip best actress.
Si Sarah Geronimo kinsa midala sa karakter ni Jasmine, usa ka special nga babaye nga suod sa iyang lola human mitaliwan na iyang mga ginikanan.
Tungod kay special si Sarah diri, dili niya halos malitok ang letrang “R” ug ang pulong nga “Sorry.” Ang lola ni Sarah nga si Lola Olive gidala sa beteranong aktres nga si Gina Pareño.
Makaingon ning tagsulat nga pang best actress ang performance ni Sarah sa “Unforgettable” tungod kay lahi kini sa mga nangagi niya nga mga salida nga aduna siya’y pares.
Sa “Unforgettable” ang iro nga si Milo o ang karakter nga Happy sa salida mao ang nahulog nga tandem ni Sarah.
Makita sa acting ni Sarah nga totally lahi nga persona ang iyahang gidala, gikan sa paghilak niini, sa linihukan, sa mata, ug bisan sa wala gituyo nga comedy ang labas sa linya niini.
Kon aduna ka’y plano nga motan-aw pa niini nga salida, pagdala nalang og tissue daan kay magsakit ang imong dughan, pakataw-on ka nga pahilakon sa karakter ni Sarah.
Makabilib usab kining iro nga si Milo nga usa ka Jack Russel Terrier ang breed tungod kay gipakita niini kon unsa ang mamahimong abilidad sa usa ka iro ngadto sa tawo.
Kinahanglan usab atngan sa gusto motan-aw sa salida ang role ni Anne Curtis nga gidala ang karakter ni Nurse Gem, sure ko, mobuhakhak mo! Natural ra usab ang acting ni Regine Velasquez dinhi isip usa ka nanag-iya og kan-anan.
Kining si Kim Molina isip Chuchay, promising usab. Grabe siya mopakatawa.
Gatuo usab me nga adunay cameo role si John Lloyd Cruz sa uwahi nga parte sa salida apan kinsa ni? Atangi!
Mao na siguro kini ang “best” nga salida ni Sarah. Ayaw pauwahi, Unforgettable!