SA LABING unang higayon, kaadlawon ang prosisyon sa bisperas sa kapistahan sa lungsod sa Consolacion karong tuiga aron paglikay nga makamugna kini ug kahuot sa dagan sa trapiko sa lugar.
Ang lungsod nagsaulog sa ilang kapistahan karon, Martes, Oktubre 29.
Si Mayor Joannes “Joyjoy” Alegado maoy una nga mipadangat sa maong suhestyon ngadto sa kadagkuan sa Consolacion Traffic Enforcement Service and Special Service (CTESS) ug sa simbahan aron dili mabalda ang motorista nga moagi sa lungsod.
Kahinumdoman ang lungsod maoy usa sa mga lugar sa Metro Cebu nga sagad masinati ang kahuot sa dagan sa trapiko panahon sa peak hours.
Mapasalamaton ang mayor nga misanong usab ang simbahan sa iyang suhestyon.
Nagsilbing parking lot sa mga sakyanan nga nanambong sa prosisyon ug manimbahay mao ang usa ka pribadong subdivision sa likod sa simbahan.
Moabot sa dul-an 4,000 ka mga lungsoranon ug parokyano ang misalmot sa prosesyon nga nanukad sa tugakaran sa simbahan sa San Narciso Parish, pasado alas 3 :00sa kadlawon ug natapos human sa kapin oras.
Gisunod dayon ang usa ka santos nga misa sa bisperas sa kapistahan.
Sa miaging katuigan ang prosiyon ipahigayon matag hapon sa bisperas diin ubay-ubay nga mga motorsita ang matanggong sa prosesyon nga mosangpot sa pagbagotbot o reklamo sa uban.
Si Felicu Jugan Leccioner Jr ang pangulo sa CTESS mibutyag nga epektibo gayud ang pagbalhin sa prosesyon ngadto sa kaadlawon sanglit wala gayuy nabalda nga motorista.
Sayo man tuod alang sa mga parokyano ang kadlawon nga prosesyon apan mas maayo na lang kini kaysa makadawat ug grabeng reklamo sa mga motorsita nga matanggong sa prosisyon sama sa miaging katuigan.
Plano karon sa CTESS kun ugaling mosugot gihapon ang simbahan sa pagpahigayon sa susamang prosisyon sunod tuig samtang wala pay laing alternate route paggawas ug pasulod sa lungsod paingon sa habagatan ug amihanang Sugbo.
“Wa ragyud tay any untoward incidents, smooth ra ang prosisyon bisag atong gi-occupy ang usa ka lane samtang ang usa ka lane atong gi two-way para sa mga motorista kay wa mannsad kaayo nangagi,” matod ni Leccioner Jr.
Samtang giawhag karon sa kagamhanan sa lungsod ang mga mamista karong adlawa sa lungsod sa dili pagpataka ug parking sa ilang nga sakyanan sa national highway aron dili usab mas mohuot ang dagan sa trapiko hilabi na sa town proper.
Giawhag usab ni Alegado ang mga manindahay ug kandila sa dili pagsugat sa mga motorista aron kalikayan usab nga maghuot sa karsada.
Aduna hinuoy mga traffic enforcer nga ipakatap sa kadalanan nga mosigurong hapsay ang dagan sa trapiko karong atol sa kapistahan. (GCM)