GILUSAD sa Philippine Coast Guard (PCG) 7 ang “Oplan Biyaheng Ayos” sugod niadtong Sabado, Oktubre 26, hangtod sa Martes, Nobiyembre 5, sa hugot nga pagbantay sa kaluwasan sa pagbiyahe ning panahon sa Kalagkalag.
Usa sa gibantayan sa Coast Guard kining kondisyon sa barko ug ang security measures sa mga pantalan ingon man ang kaluwasan sa mga pasahero nga mobiyahe karong adlaw sa mga minatay.
Matod sa tigpamaba sa PCG 7 Lieutenant Junior Grade Michael John Encina, nga aduna sila’y ipakatap nga Passenger Assistance Center o kining gitawag nila nga Malasakit Help Desk diin mamahimong makaduol ang mga pasahero kon aduna kini’y pangutana ingon man aduna’y medical teams ang ipakatap sa mga pantalan isip pagpangandam kon aduna’y nagkinahanglan og medical assistance.
Alang sa mobiyahe gamit ang mga sakyanang pangdagat, nitambag si Encina nga gidili kining pagdala og hait nga mga butang susama sa kutsilyo, mga armas, ilimnong makahubog ingon man kon masakpan, sakmiton kini.
Nitambag usab si Encina sa mga pasahero nga planohon nalang daan ang ilang dalhon nga bagahe aron dili mahasol sa seguridad sa pantalan hilabi na nga daghan ang sumasakay ug aron malikayan ang aberya.
Nakig-coordinate na usab sila sa mha shipping companies aron mapaabot ang ilahang gustong tumong mga kaluwasan sa mga sumasakay.
Gamit ang vessel information network tracking application, maahimong ma monitor sa PCG 7 kon nakabiya na ang barko o kon naabot na kini.
Bus Terminal
Gibanabana nga moabot sa 50,000 ka mga pasahero ang gipaabot nga modagsa sa Cebu South Bus Terminal (CSBT) alang sa mga adlaw sa kalag ug mga santos.
Tungod niana, mas gitutukan karon sa sakop sa CSBT ang pagsiguro nga luwas ug hapsay ang pag gikan ug pagbyahe sa mga pasahero.
Alang sa hapsay nga sitwasyon sa terminal, mopakatap ug dugang personnel ang Cebu City Police Office (CCPO), Cebu Provincial Police Office (CPPO) ug Philippine Drug Enforcement Agency (PDEA) kauban ang mga K9 nga maoy mutabang pag inspeksyon sa mga bagahe sa mga pasahero.
Giandam usab sa CSBT ang mga CCTV camera sa palibot.
Diha pa lang sa gawas hangtod, sa pagsulod na sa bus, kinahanglan nga susihon gyud sa security officers ang mga tawo nga posibleng mubuhat unya ug krimen panahon nga maghuot ang linya.
Aron dili makamugna ug traffic ang taas nga linya sa kadalanan, Giablihan usab sa Land Transportation Office (LTO) ang agianan niini.
Dili na usab pasudlon ang mga taxi ug pribadong sakyanan sulod sa terminal aron dili kini makadugang sa kahuot sa sulod.
May di mo menos 400 ka mga bus ang musulod, guwa sa terminal, apan kuwang kini matod pa ni CSBT Manager Carmen Quijano.
Nanawagan si Quijano sa mga kalungsuran sa habagatan nga mopada ug mga bus nga libreng masakyan.
Kon naa man, prayoridad niini ang mga buntis, bata, tiguwang ug PWD.
Lakip sab sa naka standby karon ang health emergency team nga maoy madangpan panahon sa emerhensya.
Sugod gahapon, Oktubre 28, 2019 may pipila na ka mga pasahero ang mibyahe na ilabi na katong mga tinun-an nga wala na’y klase.
Padayon nga pahinumdom sa CSBT nga gidili ang pagdala ug mga mahait nga butang, ug dagkong mga bagahe aron malikayan ang kalangay.
Talisay City
Si Talisay City Mayor Gerald Anthony Gullas, nangunay sa pagsusi sa kaandam sa mga sam-ang sa dakbayan, Lunes sa buntag, Oktubre 28.
Usa ka executive order alang sa mga ipangdili sa mga sam-ang ang himuon sa mayor aron sa pagsiguro nga hapsay ug malinawon ang dakbayan ning paghandum sa adlaw sa mga kalag ug mga Santos karong weekend, pipila sa mga dagkung sam-ang, pribado ug pampubliko ang giduaw sa mayor, pasado alas 8:00 sa buntag.
Sa maong paagi, giklaro b sa mayor ang ilang pagpakig-alayon sa mga kapitan ug mga tanod, labaw na sa mga pulis, ug mga traffic enforcer.
Usa na sa gisiguro niini ang insakto nga entrance ug exit, kini aron dili usab mabiktima sa mga salisi, ug uban pang klase sa kawat ang mga moduaw diha sa mga sam-ang.
Sa pagsiguro nga mahimo nga solemne ug purely pampamilya nga kalihukan, matud sa mayor nga moisyu siya og executive order, pagdili sa mga dagkung sound system, nga makahatag og pagsaba-saba diha sa mga sam-ang.
Lakip na nga idili ang pag-inum sa sulod sa sementeryo ug uban pa.
Dugang usab ni Police major Gerard Ace Pelare, ang hepe sa Talisay City Police Office nga did-an nila sa pagpasud sa mga sam-ang sa Talisay City ang mga nakainum na og mga ilimnong makahubog.
Cebu City
Ang Cebu City Government pinaagi sa Department of Public Services milimpyo sa mga public cemeteries isip preparasyon sa adlaw sa mga Kalag ug Santos.
Si Engr. Joel Biton, pangulo sa DPS nagkanayon nga ila nang gikuha ang mga basura ug gisugaan ang 15 ka mga public cemetery sa dakbayan para adunay kahayag panahon sa kagabhion.
Aduna sad silay mga portable toilet, garbage bins ug kapin 100 ka mga sakop sa metro aide kinsa maoy mo-mintinar sa ka limpyo sa lugar.
Si Atty. Jigo Dacua sa City Environment and Natural Resources Office nipahibawo nga adunay 150 ka mga barangay environment officer nga ipakatap sa mga public cemetery nga mobadlong sa magpataka og labay sa basura.
Pasabot ni Dacua nga kon dili mopatuo ang maglabay og basura, manigarilyo, mangihi sa public place, ang mga environment enforcer dili magpanuko sa pag-isyo kanila og citation ticket nga nagkantidad og P500 para sa unang dakop.
Sila si Biton ug Dacua ning-awhag ngadto sa publiko nga motabang sa City Government sa pag-mintinar sa kalimpyo sa palibot taliwa sa pagdagsa sa libuan ka mga tawo nga moadto sa menteryo.
Lakip sa menteryo nga gihatagan og igo nga atensyon sa City Government mao ang nahimutang sa barangay Carreta, Calamba, Pardo, Talamban ug ang Queen City Memorial Garden. (HBL, PAC, ANV, FMD)