GIPUKAN sa Land Transportation Office (LTO) ang 911, 82-72, sa dulang basketball sa Public Safety and Security Invitational Basketball tournament sa Davao City Recreation Center, kanhi Almendras Gym, kagahapon sa buntag, Oktubre 28.
Tabla na ang LTO ug 911 nga naay duha ka daug apan dunay usa ang pildi sa naulahi.
Gipangunahan ni Clemente Ruiz ang LTO sa ilang kadaugan kon diin mikamada siya og 26 puntos nga giabagan ni Allan Ardinio nga mitampo og 18 ug 12 gikan kang Alvin Calatayud.
Nalimitahan sa LTO ang pag-arangkada sa 911 nga ilang gilamangan og unom ka puntos (20-14) sa unang kuwarter.
Si Joel Pasaol sa 911 nga nipasulod og 34 puntos sa ilang dula kontra Public Safety and Security Command Center niadtong nakalabay nga semana, usa lang ka puntos ang nahimo kagahapon sa unang kuwarter ug 11 puntos lang sa tibuok dula.
Migukod ug nakalamang og upat ka puntos ang 911 (60-54) ug gitapus ang ikatulong kuwarter nga pabor kanila tungod sa pagsulod sa tulo ka itsa ni John Lowie Bugas gikan sa three point line apan sayo nga gibawi sa LTO ang lamang sa ikaupat nga kuwarter.
Sa pagpulihanay sa duha ka tim pagtira sa bola, milabaw ang 911, 73-72, apan nasipyat si Gonzaga sa usa ka freethrow ug igo ra natabla sa iskor nga 73.
Gilansang sa LTO ang iskor nga 73 sa 911 samtang naghinayhinay pagdugang sa ilang kamada hangtud nahurot ang oras ug natapos sa 82-75 nga pabor kanila.
Sa ikaduhang dula, wa paningta ang sakop sa PSSCC kay wa misipot ang Highway Patrol Group HPG sa ilang gitakdang dula kagahapon. Daug ang PSSCC pinaagi sa "default" sa ilang kontra.