GILUSAD kagahapong adlawa (Oktubre 28) ang random ug surprise drug testing sa mga drayber ug konduktor sa mga pasaheroang bus sa Davao City Overland Transport Terminal (DCOTT).
Gipangunahan kini sa Philippine Drug Enforcement Agency (PDEA) Davao uban sa koordinasyon sa Land Transportation Franchising and Regulatory Board (LTFRB) Davao Region.
Ang maong aktibidad subay sa Oplan Biyaheng Ayos Undas 2019 sa kagamhanan diin pagseguro nga luwas ang mga pasahero sa ilang pagbiyahe.
Giseguro sa PDEA nga walay mga drayber ug konduktor nga lango sa ilegal nga druga aron anaa gayod sa luwas nga kahimtang ang mga pasahero.
Regular na kini nga ginahimo sa PDEA ug LTFRB, gani anaa sab mopartisipar ang kapulisan sa Davao City Police Office (DCPO) aron maseguro gayod nga han-ay ang kaluwasan sa mga sumasakay.
Ang mapamatud-an subay sa resulta nga magpositibo, nan hayan makapahuway sa gyod sa pagmaneho ug pangunduktor kay lisod og makumpremiso ang kinabuhi sa mga pasahero.
Dili lang unta panahon sa dunay dagkong selebrasyon mopahigayon og drug test ang gobyerno, ipahigayon unta kini kada bulan agi og pagpaneguro diha sa kaluwasan sa publiko.