TACURONG CITY -- Nakubkuban ug nailog sa militar ang dakong kampo sa New People's Army (NPA) sa Sitio Kuden, Barangay Batang Bagras, Palimbang, Sultan Kudarat.
Nahitabo ang pagkailog sa maong kampo alas 9:25 sa buntag niadtong Dominggo.
Kini mismo ang gikompirma ni 6th Infantry (Kampilan) Division chief, Major General Diosdado Carreon.
Matud ni Carreon, naangkon ang kalampusan pinaagi sa 603rd Brigade sa Philippine Army kon diin ang kota mismo sa Regional Party Committee Daguma sa Communist Party of the Philippines-New People's Army (CPP-NPA) ang nailog.
Una nang nakadawat og taho ang mga sundalo sa dul-an usa ka gatus ka mga NPA nga giingong nagtigum sa tulunghaan nga gihimo nilang training facilities aron nga bansayon ang ilang mga bag-ong miyembro sa paggama og mga bomba.
Tungod niini, daling nilusad ang mga sundalo og air to ground assault.
Gihulagway nga ang kampo dunay mga payag-payag nga gitukod, tulunghaan, mga running trenches, foxholes ug napalibutan og mga dagkong punoan sa kahoy.
Dunay gitaho nga dunay nakalas nga lima ka mga rebelde samtang siyam ang samaron, kini subay sab sa pamahayag sa mga molupyo sa maong dapit.
Samtang nagpasalamat si Carreon sa mga molupyo nga maoy nagpaabot og impormasyon kanila bahin sa maong kota sa NPA. (Edgar E. Fuerzas)