DUHA ka mga drayber ug duha ka konduktor sa mga depasaheroang bus sa Davao City Overland Transport Terminal (DCOTT) ang giingong nagpositibo sa gihimong random ug surprise drug test sa Philippine Drug Enforcement Agency (PDEA) Davao.
Kini mismo ang gibutyag ni PDEA Davao legal counsel Joseph Tesiorna.
"Sa DCOTT, duha ka driver ug duha ka conductor ang nag-positive, but still hulaton pa sab nato ang confirmatory results para mao unya atong gamiton sa pag-file nga mamahimo na silang mo-undergo sa rehab," pagklaro ni Tesiorna nga nahinabi sa SuperBalita Davao pinaagi sa telepono kagahapon, Oktubre 28.
Dugang butyag sa abogado nga naa say usa ka drayber og taxi sa Francisco Bangoy International Airport ang nagpositibo sa ilimnong makahubog.
Matud ni Tesiorna nga ilang pahibal-on ang mga operators sa mga nagpositibo alang sa tukmang disposasyon kanila sa pag-rehab.
Gihimo ang drug test uban sa koordinasyon sa Land Transportation Franchising and Regulatory Board (LTFRB) Davao subay sa Oplan Biyaheng Ayos Undas 2019 sa kagamhanan aron pagseguro nga luwas ang mga pasahero sa ilang pagbiyahe.
Panegurohon sa PDEA nga walay mga drayber ug konduktor nga lango sa ilegal nga druga aron anaa gayod sa luwas nga kahimtang ang mga pasahero.
"Mas maayo kini, aron kampante mi nga mga pasahero. Lisud kaayo kung naka-drugs ang drayber o ang konduktor, naa sa drayber naka-angkla among kinabuhi," ingon ni Marcelo Yosores, 58, kinsa miuli padung sa Malita, Davao Occidental, sakay sa usa ka unit sa ACFB Bus, kagahapon.
Alang sa drayber nga si Hernacio Sumaliling, 55, taga Kalumpang Genaral Santos City, nga usa ka prebilihiyo ang natigayong drug testing aron ikapaneguro sa tanang pasahero nga luwas ang ilang pagbiyahe labi na nga nagsugod na og dasok ang mga pasahero nga manguli sa tagsa-tagsa ka mga probinsiya.
"Prebilihiyo kaayo ni sa amoang mga drayber, para luwas gyud ang pasahero, ug ika-sure namo sa ilaha nga wala gyud mi ga-bisyo," ingon sa drayber nga si Sumaliling nga nahinabi sa Superbalita Davao Lunes sa buntag, Oktubre 28. (Jeepy P. Compio)