GAWASNON karong panahona si kanhi Cagayan de Oro vice mayor Caesar Ian Acenas ug mga kauban human nakapiyansa niadtong Lunes, Oktubre 28, sa kasong estafa.
Gibutyag ni Police Major Edwin Lacostales, hepe sa Criminal Investigation and Detection Group (CIDG)-Mandaue City, nga sila si Acenas ug mga kauban nga sila si Ma. Esperanza Makinano, 34, taga Barangay Lapasan, dakbayan sa Cagayan de Oro; Arjun Gumban, 26, taga M'lang, North Cotabato; Ailyn Hope Matulac, 41, taga Green Meadows, Tugbok, Davao City; ug Adjetor Daya Jr., 35, taga Purok 6, Tugbok, Davao City, nagpiyansa og P120,000 matag usa o suma total nga P600,000.
Nakapiyansa ang maong mga dinakpan kini human nga nga gi-charge sa kasong estafa.
Kahinumdoman nga nabilanggo ang mga suspetsado human sa kapin napulo ka mga biktima ang nidangop sa buhatan sa CIDG ug nagpakitabang tungod kay biktima sa giingong investment scam nga gipadagan nila ni Acenas.
Gibutyag sa kapulisan nga ang Phoenix EA Holdings International Inc. dunay nakuhang mokabat sa P400 milyones nga kantidad gikan sa mga biktima sa Mindanao.