MIPASALIG man tuod og dugang imbestigasyon ang kapulisan aron pag-ila sa mga mamumuno ni Clarin, Misamis Occidental Mayor David Navarro, apan daw og sa gipasuabi man hinuon nila ang pagpalutaw sa mga pasangil nga nagduot hinuon sa mayor.
Pananglitan, usa ka opisyal sa kapulisan ang miduhig kang Navarro sa nahitabong tulis sa J Center Mall sa A.S. Fortuna St. sa dakbayan sa Mandaue niadtong Oktubre 19.
Matod pa, nga usa sa katuyoan sa pag-anhi sa Sugbo ni Navarro kinsa ilang giila nga leader sa Alferez Robbery Group, mao ang pagtabang niadtong mga suspetsadong tulisan nga nangadakpan human sa maong tulis.
Mahimong tinuod kini, pero lisod tuohan. Kon aton ning sakyan, kinahanglan pa ba diay nga siya mismo ang mangunay sa pag-anhi sa Sugbo?
Dili ba angay gani nga motago ug di siya magpaila nga iya kining mga kaabin, ilabi na kay usa siya ka mayor?
Giingon sa tinubdan nga si Navarro kinsa nalakip sa listahan ni Duterte nga nalambigit sa pagpayuhot sa gidiling drugas sa nasod, padayon nga nag-finance sa mga tulisan.
Nabutyag na ang mga negatibong pagkatawo sa napatay nga mayor, apan hangtod ning pagsulat, wala pay bisag anino na lang sa usa ka suspek nga matumbok. Morag natabunan sa pasangil.
Sa tulis sa J Center Mall, daling nakapahigayon og checkpoint ug roadblocks ang mga kapulisan. Nasikop ug dunay natipi gilayon sa pipila ka mga suspetsado. Pero sa nahitabo ni Mayor Navarro niadtong Biyernes, Oktubre 15, diin giambus-patay siya atubangan sa mga nag-escort kaniya , ambot og nganong wa gyud ni nila buhata.
Tungod niini, hayag ang posibilidad nga ang nahitabo ni Mayor Navarro mahisama ra usab sa ubang pipila ka mga pulitikong giingong nalambigit sa gidiling drugas, nga hangtod karon wala pay hustisyang migimok sa ilang kamatayon.