Lakers midaog; GSW tipi sa OKC
GIMUGNA ni Anthony Davis sa 1st half ang 25 sa iyang kinatibuk-ang 29 puntos aron agakon ang hosts Los Angeles Lakers ngadto sa dakong kadaugan batok sa Charloote Hornets, 120-101, kagahapon sa National Basketball Association (NBA).
Gawas sa iyang opensa, si Davis kuyaw sab og gipakita sa ubang mga departamento diin nakahimo siya og 14 ka rebounds ug tulo ka block shots.
Ang four-time MVP nga si LeBron James nidugang og 20 puntos ug 12 assists alang sa Lakers samtang ang laing beterano nga si Dwight Howard nitampo og 16 puntos, 10 rebounds ug upat ka block shots.
Ang Hornets, nga natagak sa 1-2 nga baraha, gipangulohan ni Miles Bridges pinaagi sa iyang 23 puntos samtang niamot og 19 puntos matag usa sila si Cody Zeller ug Terry Rozier.
Si James nagpanikad na sa umaabot gumikan kay nakakita sya’g dakong potensyal kabahin sa ilang ikabuga ning maong season hilabi na sa depensa.
Si Davis, kinsa nakuha sa Lakers gikan sa New Orleans Pelicans, miagresibo na dayon sa pagsugod pa lang sa duwa sukwahi sa nag-una niyang duha ka mga duwa isip usa ka Laker.
“I shot the ball poorly the first two games, and I was just trying to get into a rhythm. When I get easy looks, it kind of gets me going,” pasabot ni Davis.
Ang Lakers mingsaka na sa 2-1 nga rekord.
Dihang nipahuway na si Davis sa 2nd half, hayan sila na sab si James ug Howard ang ningkayod og maayo alang sa Lakers.
Si James maoy naggiya sa opensa sa Lakers samtang si Howard nipakita nga aduna pa siya’y saktong ikabuga sa tanang mga departamento.
Sa laing giatangan nga duwa, ang Golden State Warriors nasugamak sa ikaduhang sunodsunod nga dakong kapildihan sa samang gidaghanon nga mga duwa sa ilang pag-asdang sa Oklahoma City Thunder, 92-120.
Gipangulohan ni Dennis Schroders ang Thunder pinaagi sa iyang 22 puntos, nidugang og 21 puntos si Danilo Gallinari samtang niamot og 19 puntos si Shai Gilgeous-Alexander.
Ang kuwangan og mga haligi nga Warriors gipangulohan ni two-time MVP Stephen Curry pinaagi sa iyang 23 puntos.
Sa lain pang mga duwa, ningdaog ang Portland Trail Blazers batok Dallas Mavericks, 121-119, Memphis Grizzlies batok Brooklyn Nets, 134-133 (OT), ug Minnesota Timberwolves batok Miami Heat, 116-109. (AP, ESL)