GIANGKON sa kadagkuan sa Cignal TV ug TV5 nga aduna pa’y babag sa ilang pagpakignegusasyon aron mapasalida ang mga duwa sa National Basketball Association (NBA) sa Pilipinas pinaagi sa free television ug cable.
Nagkanayon si Jane Basas, Cignal TV ug TV5 president/CEO nga padayon pa silang nakignegusasyon sa NBA apan iyang giangkon nga grabe ka mahal ang bayad ug mao kini ang dakong kakulian.
“It’s very expensive and for this particular round of negotiations, [the NBA] actually increased the prices significantly higher,” matod ni Basas nga napatik sa Spin.ph.
Gipasabot ni Basas nga naalkanse ang Cignal TV dihang nakuha niini ang TV rights sa NBA Premium ug BTV gikan sa Solar kaniadto.
Apan ang pagsaka sa presyo sa TV rights sa NBA mao ang hinungdan nga dili pa sila makabuhi og pinal nga desisyon.
Wala hinuon gibutyag ni Basas kon pila ang gipangayo sa NBA ug igo lang kining misulti nga lisod kini nilang bawion kon modayon sila sa negusasyon.
Gumikan kay wala pa’y television deal, ang NBA nagpasalida og piniling mga duwa sa Facebook, Twitter ug Instagram pinaagi sa live streaming.
Ang NBA padayong mopasalida og duha ka mga duwa sa usa ka semana sa social media hangtod nga makahan-ay na sila og television deal sa Pilipinas.
Gipasabot ni Basas nga nasayod na ang NBA sa ilang tanyag ug naghuwat na lang sila sa tubag sa liga. (ESL)