KATUHOAN-dili apan nabaniog sa dapit nga ungo ang nagpatay sa 4-anyos nga batang babaye nga napalgan sa kasagbotan sa Sitio Cabangcalan, Barangay Dakit, dakbayan sa Bogo niadtong Dominggo, Oktubre 27, 2019 sa alas 7:09 sa gabii.
Si Ashley Baguio patay na nga nadangat sa tambalanan human gidala sa iyang kabanay. Adunay bun-og ug samad sa iyang tuo nga kilay.
“Ang giingon nila sa mga kabanay ug mga silingan nga giungo daw ang bata. Daghan naman gud ga giungo sa ilang dapit nga sugat-sugaton ra sa mga ungo,” matod ni Police Senior Master Sgt. Glecilda Claro, hepe sa women’s and children’s protection desk (WCPD) sa Bogo City Police Office (BCPO) nga nahinabi sa Superbalita Cebu.
Dugang ni Claro, ang bata uban sa iyang inahan nga si Angelie Tumulak, 21. Ang manghod ni Angelie ang nabilin sa balay sanglit ang iyang mga apuhan dunay gilakaw niadtong higayuna.
Ang apuhan dihang naabot nangutana kon asa si Ashley, apan wala makahibalo si Angelie, kinsa mitubag lang sa iyang amahan nga naa ra sa ilang balay.
Tungod niini, ang manghod ni Angelie, iyang amahan ug kabanay nangita sa bata apan dayon makit-i hinungdan na nabalaka sila kay nag-uwan-uwan ug dangog ang palibot.
Sa pagsubay nila sa unahan sa manggahan nga dunay kasagbutan, pipila ka metros gikan sa ilang panimalay, maoy naiwagan sa flashlight nga ang bata wala nay panimuot.
Nagsininggitay na sila og tabang aron dalhon nila sa tambalanan kay init pa ang bata nga duna lagom sa iyang kilay ug dunay samad.
Apan walay suwerte kay ang bata gideklarar sa doktor nga dead-on-arrival (DOA) sa Cebu Provincial Hospital.
Walay nakitang timailhan ang kapulisan nga dunay struggle o garas ang bata sa iyang lawas ug walay sinyales nga gilabtan ang bata o kaha gilugos.
Gawas lang sa lagom sa tuong kilay nga dunay samad.
Apan sila sa kapulisan wala motuo niini nagtuo silang dunay foul play ang kamatayon sa bata hinungdan nga nagpaabot nalang sila sa resulta sa autopsy niini nga ilang giduso na sa PNP Crime Laboratory.
Si Claro nagkanayon nga ang inahan sa sa bata wala mohilak dihang nihimo sila og follow-up investigation, dason niya, sukwahi nga reaksiyon sa usa ka inahan.
Ang tubag lang sa inahan nga wala siya makabantay sa bata kun nigawas ba nalipat siya kay nagpatutoy siya sa manghod niini niadtong higayona nagtuo lang siya nga nagduwa didto sa ubos sa ilang mga silingan.
Nasuta sa kapulisan nga ang mga ginikanan ni Ashley nagkabuwag. Ang inahan niini duna nay laing gikapuyo.
Ang tanang angulo sa krimen gisubay karon sa kapulisan sa Bogo, lakip na sa kaaway sa pamilya sa dapit.