LAING clearing operation ang gilusad sa sidewalk sa Barangay Tangke, Dakbayan sa Talisay Martes, Oktubre 29, 2019.
Si Jonathan Tumulak, pangulo sa City of Talisay Traffic Operations Development Authority (CT-TODA), miingon nga ang maong clearing operation tubag sa hangyo sa barangay kapitan sa Tangke nga si Nelson Cabanes nga limpyuhan ang ilang sidewalk gikan sa mga nakaali nga mga istraktura ug illegal parking.
Lakip sa gipangtangtang ang mga tanum nga gipamutang sa sidewalk, automatic tubig machine, mga dagkong bato, ug e-bike.
Adunay mga nilapas nga atop sa sidewalk ug mga parte pa sa tindahan ang giguba sa clearing team.
Matud ni Tumulak nga duha ka semana sa wala pa ang clearing operation, gipadad-an na og notisiya ug girekoredahan pa ang mga apektado.
Gani pasado alas 8 Martes sa buntag, sa wala pa sugdi ang clearing, nihimo og laing pagpahibalo ang mga sakop sa clearing task force.
Gawas sa Barangay Tangke, nitug-an si Tumulak nga aduna pay laing barangay ang nisuwat kanila aron magpatabang sa paghawan sa ilang sidewalk.
Ang maong clearing operation subay sa mando ni Presidente Rodrigo Duterte. (FMD)