MOABOT sa 53 ka tawo ang nangasikop sa nagpadayong Oplan Limpyo Talisay Lunes sa gabii, Oktubre 28 hangtud Maryes sa kadlawon, Oktubre 29, 2019 sa managlahing barangay sa dakbayan.
Matud ni Police Major Gerard Ace Pelare, ang pangulo sa Talisay City Police Station, nga 22 ka tawo ang nangadakpan tungod sa ilegal nga drugas atol sa gilusad nga unom ka buy-bust operation.
Laing 25 ang nangadakpan gumikan sa pagpahigayon og sugal sama sa swertres, tong-its ug sabong sa kaka diin pipila sa mga nasikop tinun-an sa kolehiyo.
Unom ka tawo ang nasikop pinasikad sa warrant of arrest.
Gibutyag ni Pelare nga ila nang napasakaan og kaso ang mga dinakpan Martes sa buntag. (FMD)