MIKAYOD sa tanang mga departamento si Draymond Green aron tabangan ang Golden State Warriors sa pagbuntog sa hosts New Orleans Pelicans, 134-123, aron irehistro ang labing una nilang daog sa National Basketball Association (NBA) 2019-20 season kagahapon.
Si Green nagpakatap og 16 puntos, 17 puntos ug 10 ka assists aron isaka og balik ang moral sa Warriors nga nahugno human sila nakatilaw og dagkong mga kapildihan sa nag-una nilang duha ka mga duwa batok sa Los Angeles Clippers ug Oklahoma City Thunder.
Apan matod ni Green nga dili gihapon siya kumbensido sa ilang kadaugan ug daghan pa sila angayang trabahuon hilabi na nga dagkong haw-ang ang kinahanglan nilang tapakan sa pagbiya ni Kevin Durant ug pagkaangol ni Klay Thompson.
“We’re still not a very good team,” matod ni Green.
Ang kanhi two-time MVP nga si Stephen Curry nidugang og 26 puntos ug 11 assists alang sa Warriors, niamot og 24 puntos si D’Angelo Russell, nihatag og 23 puntos si Damion Lee, nitunol og 13 puntos si Jordan Poole samtang nitampo og 12 puntos si Glenn Robinson III.
“We got to continue to compete at a high level. The first two nights we didn’t do that. Tonight we did,” matod ni Green.
“As leaders of this team, we continue to try to bring it every night and give them something to follow and, you know, we’ll win some games.”
Ang Pelicans, nga nahagsa sa 0-4 nga rekord, tataw nga wala’y ikasukol sa maayong duwa nga gipagawas sa Warriors.
Ang layup ni Green sa nahabiling 5:07 minutos naghatag sa Warriors og 128-99 nga labaw ug ning mga gutloa, tatawng miisa na sa ilang puti nga bandera ang Pelicans.
“We were never in the game,” matod ni Pelicans coach Alvin Gentry. “We never had any chance at all to win and I think that’s the most disturbing thing to me — especially playing at home.”
Ang Pelicans gipangulohan ni Brandon Ingram pinaagi sa iyang 27 puntos ug 10 rebounds.
Ang Pelicans ningkombati nga wala ang tulo sa ilang mga sinaligan lakip na ang beteranong si Jrue Holiday, ug starting center Derrick Favors.
“We have enough guys in here where we feel like we can win basketball games. We won’t get discouraged at all,” batbat ni Ingram.
Sa laing duwa, ang gikonsiderar nga labing inilog nga maghari ning maong season nga mao ang LA Clippers ningmakmak sa Charlotte Hornets, 111-96.
Sa lain pang mga sangka, ningdaog ang New York Knicks batok sa Chicago Bulls, 105-98, Houston Rockets batok Oklahoma City Thunder, 116-112, Detriot Pistons batok Indiana Pacers, 96-94, Toronto Raptors batok Orlando Magic, 104-95, Milwaukee Bucks batok Cleveland Cavaliers, 129-112, Philadelphia 76ers batok Atlanta Hawks, 105-103, San Antonio Spurs batok Portland TrailBlazers, 113-110, Denver Nuggets batok Sacramento Kings, 101-94, ug Utah Jazz batok Phoenix Suns, 96-95. (AP, ESL)