SAMA sa gilauman, naangkon sa University of Southern Philippines Foundation (USPF) ang ikatulo nilang sunodsunod nga titulo sa Cebu Schools Athletic Foundation Inc. (Cesafi) Season 19 high school volleyball tournament niadtong Lunes, Oktubre 28, 2019, sa Aznar Coliseum.
Ang USPF ninghampak sa University of San Jose-Recoletos (USJ-R) sulod sa upat ka sets, 17-25, 25-21, 25-14, 25-12, sa deciding Game 3 sa championship series.
Giangkon ni USPF coach Yolanda Rizzari nga dako ang ilang pagtuo nga mopatigbabaw og balik human nila nasakmit ang korona sa miaging duha ka mga tuig.
Gipasabot ni Rizzari nga nagtutok sila’g maayo sa ilang gitinguhang Grandslam title apan nakaagi gihapon sila og pagpanghudlat gikan sa USJ-R.
Ang USPF nakatilaw og kapildihan sa Game 2 nga maoy nakapugos sa deciding Game.
Matod ni Rizzari nga iyang gisultihan ang iyang mga batos nga kinahanglang makabawi sila gikan sa ilang kapildihan sa Game 2.
Ang USPF nasugamak sa kapildihan sa 1st set ug human niini, matod ni Rizzari nga iyang gipahimangnuan og balik ang iyang mga magduduwa.
Matod ni Rizzari nga dako niyang kalipay nga maayo ang reaksyon sa mga batos.
Sa 2nd set, hinayhinay nga nahigmata ang USPF ug ilang gibawsan ang USJ-R.
Sa nagsunod nga duha ka mga set, tataw nga nanakuha na og saktong kadasig ang USPF ug ilaha nang gidominar ang hinampakay.
Si Mitzi Panangin sa USPF maoy napiling Most Valuable Player ug First Middle Blocker. (RSC, ESL)