Sugilanon: Ang buktot

NIINING buntaga misuroy si Hari Israel sa tanaman nga dili layo sa iyang palasyo. Ang tanaman gihugopan sa mga alibangbang tungod sa talagsaong kahumot niini kay may nagkalain-laing matang sa mga buwak nga mihatag og alimyon sa tibuok palibot sa palasyo. Gusto sa hari nga makahanggap og lab-as nga hangin, ug labaw sa tanan miapas siya kang Prinsesa Diana nga una nang nagsuroy sa ilang tanaman.

Nakita a hari ang anak niyang prinsesa nga nangutlo sa preskong mga buwak. Miduol siya sa anak. Nakita siya ni Prinsesa Diana.

“Anak kong prinsesa, nag-unsa ka ning atong tanaman?’ pangutana ni Hari Israel.

“Gusto kong makita ang maanindot nga talan-awon dinhi sa atong hardin, amahan kong Hari,” tubag ni Prinsesa Diana. “Ug labaw sa tanan, gusto kong makita pag-usab katong buktot nga miluwas kanako niadtong miaging adlaw.”

“Ah, si Ramer ang imong gipasabot?” ni Hari Israel.

“Oo, amahan kong Hari.” ni Prinsesa Diana. “Gusto kong pasalamatan siya pag-usab. May kasayuran ka ba kon hain siya magpuyo, amahan kong Hari?”

Wa motubag si Hari Israel. Nasayod siya nga may gitaguang pagbati ang iyang anak niadtong buktot. Giluwas si Prinsesa Diana ni Ramer dihang hapit mahulog sa kimba ang gisakyan niining karwahe samtang ang prinsesa nagsuroy sa dapit nga kasikbit sa gingharian ni Hari Israel. Ug dihay higayon nga dagiton unta ang prinsesa sa tulo ka armadong tawo, apan nahiatol nga diha si Ramer nga nagpasilong sa punoan sa kahoy nga tugas gikan sa naglagiting nga kainit sa adlaw. Migamit si Ramer sa iyang pana ug gipana ang tulo ka armadong tawo. Pulos naigo ang tulo ug nangamatay. Naluwas si Prinsesa Diana ug nagpasalamat kini kang Ramer.

Nalipay si Hari Israel pagkasayod niya niini. Iyang gipatawag ang buktot sa iyang mga sakop. Dihang dinha na si Ramer sa palasyo iyang nakita ang hari ug ang prinsesa sa tanaman.

“Maayong buntag kanimo, mahal nga Hari, ug kanimo, mahal nga Prinsesa!” pangatahuran ni Ramer. Gibati og kaibog si Ramer kang Prinsesa Diana.

“Ramer,” sangpit ni Hari Israel, “salamat sa pagluwas mo kang Prinsesa Diana!” Unya may gitunol siya kang Ramer usa ka puntil nga puno sa bulawan.

“Dili ko kana madawat, mahal nga Hari,” matod ni Ramer. “Aduna sab kami daghang bulawan didto sa among gingharian.”

Nahingangha ang hari sa gipamulong ni Israel. Apan wala niya kini tuohi. May gihangyo si Ramer sa hari nga maoy nakapasuko niini.

“Mahal nga Hari, gusto ko nga mangasawa kang Prinsesa Diana,” ni Ramer.

“Unsaaa? Wa ka malipong? Wa ka makasud-ong sa imong kaugalingon? Naa pay imong buko-buko morag bukid sa Cambinukot!” singgaak sa hari.

“Wa ko magtiaw, mahal nga Hari. Tinuod ang akong gisulti!” ni Ramer. “Usa ako ka prinsipe sa among gingharian. Kon may babaye lang nga tinuod nga mahigugma kanako ug dili magpanuko pagtugyan sa iyang gugma kanako, bulahan gayud siya! Daghang babaye nga nagbiaybiay nako ug pakyas ako. Si Prinsesa Diana ang akong paglaom uban sa imong pagrtugot.”

“Ha! Ha! Ha! Hilom!” matod sa hari nga mabiaybiayon. “Pahawa karon dayon! Kay kon dili, ipadakop ko ikaw sa akong mga sakop ug ipabilanggo.”

Daling mibiya si Ramer sa tumang kahadlok, apan nakit-an siya sa usa ka babaye nga suluguon sa palasyo, si Melodina, MIduol siya kang Ramer.

“Ramer,” matod sa babaye. “Nabati ko ang tanan ninyong gipanagsulian sa Hari. Andam ko nga mahimo nimong kapikas. Mahal ko ikaw, Ramer!”

“Tinuod ba ang imong gisulti, Melodina?” ni Ramer. “Wa ka ba magtiaw?

“Oo, tinuod, Ramer, ang akong gisulti,” tubag ni Melodina. “Kon mao kana, bulahan ikaw nga wa magpnuko pagdawat sa akong gugma. Ug kini gikalipay sa amahan kong Hari, si Hari Dakoykoy,” ni Ramer.

Migakos si Melodina kang Ramer ug gihagkan ang mga ngabil niini. Unya kalit nga nahimong usa ka guwapong prinsipe si Ramer. Ang buktot nga kaniadto gitunglo sa ungo, karon usa diay ikaw ka guwapong tawo ug adunahan sa tibuok gingharian. Wa motubag si Hari Israel. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph