Diputado: Kombati sa mga Barretto
UNSA kaha ang rason nga gipatay man si Mayor David Navarro sa Clarin, Misamis Occidental?
Dili na kini matubag sanglit namatay na man si Mayor Navarro. Dili sab nato mapaabot nga adunay mogawas nga testigo nga mosulti sa hinungdan sanglit kadto lang mibanhig kaniya ang makasulti niini.
Mogawas nga pulos lang pagduda ang mga pasangil kaniya.
Unsa man kining maong mga pasangil?
•••
Una, nga siya naapil sa negosyo sa druga.
Gani, naapil man ang iyang pangalan sa listahan ni PRRD sa mga tawo nga gitawag og narco list.
Tungod niini, naapil si Mayor Navarro sa mga tawo nga gidudahan nga nagpaluyo sa negosyo sa ginadiling druga.
Apan kutob lang kini sa pagduda kay hangtod karon, wala man gyod mapasakai og kaso si Navarro kalabot sa ginadilling druga. Og labi na nga wala siya hukmi sa hukmanan nga sad-an.
Pulos lang pagduda ang tanan.
•••
Ikaduha, gidudahan nga nahilambigit siya sa mga nanghitabong tulis sa Cebu ug uban pang lugar sa nasod.
Sama sa nahauna, pulos lang pagduda ang tanan kay wala man gyod siya mapasakai og kaso unya nahukman nga sad-an. Gani, midaog man siya sa miaging piniliay bisan pa sa mga pasangil batok kaniya og bisan pa sa iyang pagka-apil sa narco-list. Kon nganong nakadaog siya, nagpasabot lang kini nga bagang duot sa katawhan sa Clarin nagtuo nga siya ang angayan nga modaog pagka-mayor sa maong lungsod.
•••
Tungod sa pagduda ni PRRD nga basin ang kapolisan mao ra sab ang nagpaluyo sa kamatayon ni Mayor Navarro, mimando kini sa kapolisan nga hunongon ang imbestigasyon nga gihimo niini og ang NBI na ang gimandoan nga mohimo sa maong imbestigasyon.
Bug-at kining maong pagduda ni PRRD.
Ngano man?
Lisod tuhoan nga maka-organisar sa ingon adto kadali ug ingon adto pagka-buhat ang bisan kinsa nga grupo nga nagplano pagpatay kang Mayor Navarro.
Pipila lang ka adlaw, tiklo na dayon si Navarro.
Sama sa nasayod na daan ang mga nagbanhig kaniya og unsang orasa ug asang dapita moagi ang iyang gisakyan padung sa City Prosecutors’ Office sa M. Velez Street.
Klaro kaayo nga nasayod sab sila og unsay gisakyan ni Navarro og asang dapita naglingkod si Navarro.
Labi na nga klaro kaayo nga nasayod sila nga nagsul-ob si Mayor Navarro og bulletproof vest maoy hinungdan nga sa ulo gyod siya pusila.
Mao kini mga hinungdan nga nag-una gyod ang kapolisan sa kadudahan nga nagpaluyo sa maong pagbanhig.
Karon kay ang NBI na man ang mohimo sa imbestigasyon, mogawas nga mas katuhoan ang resulta niini.
Ang pangutana mao kini: Masolbad ba kaha sa NBI ang maong kaso? Duna ba kahay testigo nga mosulti bahin niini?
Mentras tanto nga wala, mahulog sa haka-haka lang tanang pasangil batok kang Navarro.
•••
Perteng grabeha ang mga managsuong Barretto nga sila si Gretchen, Marjorie ug Claudine.
Ngano man?
Wala sila morespeto sa kamatayon sa ilang amahan kay bisan sa vigil niini, nag-away pa gyod sila.
Ug ang mas grabe sa tanan, wala silay respeto ni PRRD tungod kay bisan gihangyo sila nga dili mag-away, wala gyod mopatuo ang managsuon kay nagsambonot gyod.
Grabeha gyod ka way batasan noh?
Buyno, sama sa samad nga way pagka-ayo ang batikos sa katawhan batok kanila, dili lang sa Pilipinas kondili sa tibuok kalibotan. Misamot kadaghan ang nagsunod sa maong eskandalo og sama sa lisod na makalimtan ang gihimo sa mga managsoon.
Nagkutay-kutay na kini og gani, nadamay na man si Atong Ang ug ingon man ang usa ka dato kaayo og ilado kaayo nga negosyante nga naila nga maoy nagpadagan sa usa ka higanteng negosyo sa ilimnong makahubog... ug daghanon pag-inom.