KON tinuod nga dunay kalag nga mobalik mangaboang tingali sa kahadlok ang mga nakapatay.
Apan kay di man lagi tinood ug daghan ang di motuo nagpadayon ang pagpamatay sa mga tawo nga ilang kontra ug gikalagutan.
Miabot nalang ang laing kasaulogan sa kalagkalag karong tuiga 2019 wa gyuy balita nga namatay ang usa ka tawo kay gituok sa kalag!
Apan dunay nalisoan sa ilang maayong panghunahuna kay gihasol sa ilang konsensya kay nakapatay.
Pila kaha unya kabuok sa mga pulis ang maboang sa konsensya kay nakapatay og mga durugista ug mga durugista nga nakapatay sa mga inosenting sibilyan?
Pulis ang nagpatay
Tan-awa migawas na sa baba ni Presidente Rodrigo Duterte ang mga pagduda nga pulis ang nakapatay ni Mayor David Navarro sa lungsod sa Clarin, Misamis Occidental.
Mao ni akong nabiliban sa presidente di mahadlok ug dunay kaisog aron isulti ang tinood ug ipaagi lang og pasumbingay.
Una nang nakabantay ang asawa sa mayor mao nga wa magpaabot nga matagaan ug hustisya ang kamatayon sa iyang bana.
Tungod niini, gitugyan sa presidente sa National Bureau of Investigation ( NBI ) ang imbistigasyon sa kaso aron way “bias.”
Maldito gyud ni atong Presidente! Ang pangutana, unsaon man pagkasikop kon tinuod man ang pulis ang responsabli sa pag-ambush sa mayor kay si Duterte man mismo ang nagsugo?
Ang gobyerno hugot nga mikampanya batok sa problema sa ilegal nga drugas ug anaa sa narcolist si Navarro.
Nag-away
Ako nang gihagit ang mga reklamante nga taga lungsod sa Boljoon sa pagpasaka og kaso batok sa ilang mayor.
Nakadawat man gud ko og daghang reklamo batok ni Mayor Merlou Derama sa lungsod sa Boljoon, batok sa isyu sa korapsyon.
Salamat sa inyong pagsalig pinaagi sa pagduol kanako ug anaa akong suporta kaninyo.
Apan nahibawo ko sa inyong kaisog dungan sa paghangyo sa pagda sa kaso ngadto sa Ombudsman.