MALITA, Davao Occidental -- Gihangop sa mga taga Jose Abad Santos (JAS) ang ilang kandidata ang napili nga bag-ong Reina de Davao Occidental atol sa koronasyon nga gipahigayon sud sa Malita Gymnasium, Dominggo sa gabii.
Gikoronahan mismo ni Governor Claude Bautista ang bag-ong reyna nga si Blessing Yacon.
Dali sab nga nipaabot sa iyang pagtimbaya si JAS Mayor Jason John Joyce ngadto sa ilang kandidata kinsa nipakita sa kaanyag ug talento atol sa kompetisyon.
Bisan mga netizen sa lugar nipaabot sa ilang pagtimbaya ngadto kang Yacon pinaagi sa social media.
Samtang sa pagsaulog sa ikaupat nga Araw ng Davao Occidental sa nakalabay nga adlaw, nipasundayag ang mga partisipante gikan sa nagkadaiyang tunghaan ug mga lokal nga gobyerno pinaagi sa street dancing diin ang grand showdown gihimo sa Malita Public Market.
Sa pagpamulong sa gobernador, gipaabot niini ang iyang dakong pasalamat ngadto sa tanang opisyal sa mga barangay ug 5 ka mga lungsod sa probinsiya nga mao ang Sarangani, Don Marcelino, Sta. Maria, Malita ug JAS.
Gipasalig sab ni Bautista ngadto sa katawhan nga magpadayon ang ilang tiunay nga pag-serbisyo aron mas molambo pa ang probinsiya.
Sumala sa gobernador nga dako ang iyang pasalamat sa iyang mga igsuon nga nagtinabangay aron mahatag sa katawhan ang mga proyekto alang sa kalamboan.
Sa kinatibuk-an, gibutyag sa kapulisan sa probinsiya nga hapsay ug malinawon ang usa ka semanang selebrasyon.
Padayon sab nga nag-ampo ang mga opisyal nga ipahilayo sila sa mga kalamidad ilabi na nga ginatay-og sab ang ubang lungsod sa linog.