Huna-hunaon ang 'safety condition'

Huna-hunaon ang 'safety condition'

SA SUNOD-SUNOD nga pagtay-og sa linog dinhi sa isla sa Mindanao, daghang gambalay ug tulunghaan ang nakabaton og kadaut karon.

Nagpasabot lamang kini nga di pulido ang pagkatrabaho mao nga nangliki ang uban, samtang ang uban nahugmak.

Sa gipakita nga mga hulagway sa social media kagahapon, dunay mga gambalay sa publikong tunghaan nga nakabaton og kadaut bisan nga bag-o pa lamang nahuman.

Sa yano natong pag-analisa, nahitabo kini tungod kay sub-standard ang materyales nga gigamit sa kontraktor.

Nganong nahitabo kini? Tungod sab sa grabeng kurapsyon sa mga politiko nga tinubdan sa pundo sa ila kunong proyekto.

Siyempre, bawion sa kontraktor ang halos 25 porsyento nga makibhan sa pundong salapi nga mopaingon sa bulsa sa politiko.

Unsaon nila pagbawi? Aw, siyempre, pinaagi sa paggamit sa sub-standard nga mga materyales aron sila makabarato ug makaginansya sa gikontrata nga proyekto.

Busa, kining nahitabo sa pipila ka mga gambalay sa publiko nga mga eskwelahan ug uban pang proyekto, magkapahigmata unta sa mga way balatian nga opiyales sa gobyerno.

Sa mga pribadong gambalay nga nakabaton usab og kadaut, kinahanglan nga mosunod gayud sa Building Code of the Philippines.

Siyempre di nato mapugngan ang kakusog sa linog, apan mapugngan ang dakong kadaut kung mosunod kita sa balaod.

Kini nga panghitabo makapausab unta sa sistema sa paghatag og building permit sa mga magtukod og mga gambalay.

Kinahanglan nga istrikto ang building official sa pag-inspeksyon sa mga gambalay nga tukuron sud sa ilang hurisdiksyon.

Sa mga magtukod sab og gambalay (gagmay man o dagko), seguroha ang kaluwasan sa mga tawo pinaagi sa pagsunod sa balaod, di gyud magdaginot.

Kay walay pagmahay nga nag-una, naa gayud kanunay sa kaulahian. Busa, ato gayud huna-hunaon ang "safety condition" sa tanang panahon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph