SUPERBALITA DAVAO

Gitay-og sa kalisang

GITAY-OG sa laing kusog nga linog ang pipila ka bahin sa Mindanao kon diin nakahatag kini og kalisang sa katawhan ug pagkadamyos sa pipila ka mga gambalay ilabi na sa dakbayan sa Davao, Davao del Sur ug sa North Cotabato.

Usa ka magnitude 6.6 nga linog ang niigo sa Tulunan, Cotabato alas 9:04 sa buntag, Oktubre 29.

Sumala sa Philippine Institute of Volcanology and Seismology (Phivolcs), ang pagtay-og usa ka tectonic in origin sa gilawmon nga 7 kilometros.

Sa Davao City, nabati ang linog sa intensity 6, samtang nabati sab kini sa mga mosunod nga lugar:

* Intensity 7 -- Kidapawan City, ug Malungon, Sarangani

* Intensity 5 -- Alabel, Sarangani, ug Tupi sa South Cotabato

* Intensity 4 -- Gingoog City, Misamis Oriental, ug General Santos City

* Intensity 2 -- Zamboanga City

* Intensity 1 -- Dipolog City, Bislig City, ug Palo, Leyte

Unang natala sa Phivolcs ang magnitude 6.4 sa ilang bulletin alas 9:04 sa buntag, apan giusab kini ngadto sa magnitude 6.6 sa ilang bulletin sa 9:44 sa buntag.

Samtang giklaro ni Vidad nga gilauman nga ang tibuok isla makasinati og mga aftershocks sa mga mosunod pa nga adlaw.

Di pa hinuon masulti niini kon duna pay aftershock nga kusog pa sa 6.6 gumikan kay nag-obserba pa lang sila sa lihok sa yuta.

Way hinuoy tsunami advisory human sa earthquake tungod kay ang epicenter sa linog naa sa ground level.

Gipost sa Phivolcs nga alas 4:43 sa hapon, kinatibuk-ang 95 ka linog, lakip ang mga aftershocks, ang nahitabo sa Mindanao human sa magnitude 6.6 nga pagtay-og.

Usa ka 6.1-magnitude aftershock nahitabo didto gihapon sa Tulunan alas 10:42 sa buntag.

Moabot ngadto sa 15 ka mga tinun-an ug magtutudlo sa Daig Elementary School sa Tulunan ang nasamdan human tulo sa ilang upat ka mga gambalay nahugmak sa linog.

Samtang usa ka tawo ang namatay ug dunay 43 ka lain pang uban ang naangol sa maong linog.

Sumala sa inisyal nga taho, ang National Disaster Risk Reduction and Management Council (NDRRMC) nag-ila sa biktima nga si Nestor Narciso, 66.

Giingong natumpagan siya sa Koronadal City sa South Cotabato.

Samtang sukad alas 11:45 sa buntag, ang Davao City Public Safety and Security Command Center (PSSCC) nitaho nga way na-missing o namatay sa siyudad.

Apan ang PSSCC nakatala og 54 ka lugar nga naapektuhan sa linog.

Ang dakbayan gitahong nakasinati og gagmay nga mga liki sa bungbong sa mga mosunod nga mga tulunghaan: Tacunan Elementary School, Tacunan National High School, Mintal Comprehensive High School, Mintal Elementary School, Calinan Elementary School, Calinan High School, Matina Pangi Elementary School, Magtuod Elementary School, Manambulan Elementary School, Maa Elementary School, Maa National High School, Palmeto Building, Aflect Elementary School sa Barangay Panacan, Corquera Elementary School sa Barangay Panacan, Cabantian Elementary School, Wilfredo Aquino Elementary School, Wilfredo Aquino Barangay Hall, Tagurano Barangay Hall, Lots for Less in Matina Aplaya, Sped Bangkal, Matina Biao Elementary School, Matina Biao High School, Gumalang Elementary School, Talomo Elementary School, Dona Carmen National High School, University of Southeastern Philippines Obrero, Holy Cross of Mintal Senior High Building 3rd Floor, University of the Philippines Mintal Sports Complex, Marilog Gym, Bustamante High School, Bustamante Elementary School, Bayabas Elementary School, Sto. Nino National High School, Don Enrique Bustamante National High School, Bago Gallera Elementary School, and Gaisano Mall of Davao sa Bajada.

Dagkong mga liki natala sa Felcris Centrale sa Quezon Boulevard, Catalunan Grande Elementary School, ug Catalunan Grande High School, samtang dagkong damyo gitaho sa Gaisano Grand sa Toril, ug Ecoland 4000 Condominium.

Ug duna pay mga ginagmay nga mga liki sa uban pang mga tulunghanan ug bangko.

Usa ka abandonado nga tindahan sa Toril Public Market gitahong nahugno atol sa linog.

Ang southbound sa Bolton Bridge sa Quimpo Boulevard, Barangay 76-A Bucana, gitahong nakabaton og mga liki.

Ang Oroderm City Complex building sa dalang C.M. Recto gitaho sab nga nakabaton og "inclined" atol sa linog.

Human sa linog, ang lokal nga kagamhanan sa siyudad nagsuspende sa klase sa tanang level sa pribado ug publikong tulunghaan ug unibersidad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph